Cas Marie a cera su portanan manera gobierno a anuncia cu tin caso di coronavirus na Aruba. Nan a tuma e decision pa asina proteha nan cliente cu ta forma parti di nan famia.

Lisette Does, coordinador di Cas Marie ta duna di conoce cu nan 22 cliente, tin contacto estrecho cu nan famia. Ta conoci cu Cas Marie ta pasa dia di 8or di mainta te cu 4or di atardi y ta ofrece actividad na pashent cu demencia sinti nan mes mas contento y calidad di bida miho pa nan y famia na cas.

Sinembargo 13 di maart ora cu tabata bezgi cu actividad di Aruba Doet ora nan a haya e noticia ‘e ta bay bira problema grandi’ nan a tuma decision pa no tuma mas cliente. “Nos a bay den contacto cu famianan y anuncia via e chat app cu nos tin cu famia y a bisa cu lo cera portanan di Cas Marie y pa asina cliente no bin mas.

E ta bisa cu for di dia 15 di maart nan a cera porta, di nan banda e team a bin hunto pa asina zorg y tene cuenta kico nan ta bay haci cu ‘nos famia di Cas Marie’ pasobra contact tin cu keda. Nan a tuma contact cu cada famia ‘contento cu e mundo moderno cu ta duna e capacidad ey’.

Famianan ta laga sa cu tin cliente ta haya falta di rutina pa bay Cas Marie, nan ta hiba nan te na porta di Cas Marie pa asina splica nan cu e ta cera pa motibo di vakantie ‘con ta splica hende cu tin demencia cu nos ta cera pa coronavirus’.

Sinembargo Does ta bisa cu e preocupacion apart di nan cliente di Cas Marie, ta cu tin mas famia cu tin hende cu demencia den cas cu no ta cliente di nan. E cos mas importante cu e ta bisa ta cu famia mester tin ta pasenshi.

“Pensa riba bo mes, con abo mes ta pasado den temponan aki? Hende tin’e dificil den cas caba, pasobra cada hende kier nan espacio, henter ora paden, no tin e mesun libertad. E ora un persona cu demencia y problemanan cu nan no por expresa nan mes manera debe ser”, e ta bisa

Pa e motibo aki e ta bisa pa famia tene hopi pasenshi y evita problema cu nan. Does ta bisa cu e malesa ta exigi un structura. Sea si ta lanta mainta tal ora, nan por lanta, kleur, pone nan lesa buki sin importa con e ta les’e ‘no coregi djis tende’ pone nan yuda seca un copi, laga nan haci manera ta guia den cushina ‘purba enjoy e momento cu nan sernan keri’ pa motibo cu no sa con largo esaki ta bay dura.

E ta conseha pa gosa e momentonan negativo pa hacie positivo. Purba evita pa nan bira agresivo, nan no ta compronde y ta keda un grupo dificil. Pa e motibo aki Does tambe a uni cu e liña di Kibrahacha pa asina yuda e hende grandinan cu approach mas facil y ta conta pa esnan cu demencia tambe.

“Mester tene na cuenta cu demencia no ta pa hende di 80 aña so, tin persona cu 52 aña di edad cu tin demencia. Esey ta edad jong. Pues si famia yama cu tin problema, por haci esey nan lo join y yuda esnan cu tin demencia”, e ta bisa.

Does ta duna di conoce cu nan miembro nan ta tur bou control y comunicacion cu famia. Pero pa esnan cu no ta cliente, corda cu un pashent cu demencia ta keda ripiti cosnan, pues pasenshi ta keda e tip, ta dificil pa esnan cu ta biba nan so cu un persona demencia.

Sinembargo e ta bisa ‘tene man na bo curason’ si na momento famia no por of no tin famia, Does ta bisa pa lag’e sa cu e lo ta dispuesto pa yuda haci compras ‘e ta fastioso si pasobra bo expone bo mes eyfo’ pero mester duna man y yuda hende cu no por hacie.

Si tin famia cu tin pregunta of kier algun tips, nan conseho pa tuma contacto via Cas Marie su facebook of bou di liña di Club Kibrahacha cu CEDE Aruba cu tin nan number directo pa haci esaki. Si e ripara cu ta caso cu ta mester bay mas ley, nan lo yuda cu dokter of psicologo.