Lionel Croes: ‘DPL cu dos localidad pa duna miho servicio’

Departamento di Progreso Laboral (DPL) ta den e fase di crecemento y mehoracion di nan servicio. Lionel Croes, marketing manager di e departamento a comparti algun cambio cu lo tin pa comienso di luna di october.

No solamente nan lo cambia di servicio pero e departamento lo cambia di localidad. E lo tin un lugar mas amplio y lo bay tin dos localidad; un na Engelandstraat na e edificio unda Enseñanza pa Empleo ta keda, y un otro departamento na San Nicolas cu lo habri su porta proximamente.

A scoge e localidad di Engelandstraat pa motibo cu lo tin mas espacio unda por tin un servicio optimal y tambe mas profesional, cu pa tur buscado di trabou lo tin tempo y espacio priva pa scucha nan deseo.

Croes ta bisa cu e situacion na e departamento lo cambia y kier informa tur cliente y publico en general cu nan a para nan servicio pa publico y ta reanuda trabou 1 di october. “Nos kier mehora nos calidad di servicio, nos organisacion y nos kier yega mas cerca di pueblo,” e ta splica.

Tambe el a comparti cu nan tin cliente na San Nicolas tambe y pa e motibo ey a opta pa habri un localidad pariba. Nan sa cu tin cliente cu ta pasa e departamento y nan kier duna mas oido na nan y ta mas cerca di comunidad.

No tin un luga specifico pa San Nicolas ainda pero e ta bisa cu lo ta un luga central den caya. Croes ta bisa cu ta bira mas facil pa hende cu ta biba pariba, unda awor ainda nan mester coy bus pa yega na DPL na Playa.

“San Nicolas ta keda pendiente ainda pasobra tin algun informacion cu mester haya di ariba pa nos por trece claridad, pero sigur e ta bay habri. Tin trabou tumando luga y e movecion ta andando sigur, unda Aruba lo disfruta di servicio di un calidad superior,” Croes a expresa.

Tambe ta pendiente na e facilidad e parti tecnico, loke ta trata instalacion di coriente, telefon, internet. E proceso ta andando y pronto nan lo habri nan porta. Pendiente di tur locual ta andando, segun schedule y planning lo ta habri atrobe cuminsamento di october.

Segun Croes, cu esey ta cumpli cu mision y vision di minister di asunto di labor, cu ta duna sosten na DPL den e fase di cambio aki. “Tur e trahadonan di e departamento ta actualmente activo den e parti di yuda ruim op pa pronto nos muda pa nos localidad nobo.”

A puntra Croes, dicon a scoge e localidad di Enseñanza pa Empleo; si ambos departamento lo bay traha hunto. Croes a bisa cu e parti di educacion ta importante pa servicio di DPL, unda por combina busca empleo cu mehora conocemento pa hoben y adulto.

E ta splica cu hopi biaha un hende ta busca trabou pero tambe tin e parti di educacion cu ta yuda eleva calidad como profesional y no profesional. “Nos ta kere cu ora bo educa bo mes e por yuda bo haya un miho trabou y ta yuda e persona crece tambe. Unabes bo crece, bo ta bon prepara pa traha den mercado laboral di pais Aruba. Nos ta kere den nos yiu di tera y esnan cu ta bibando cu permiso permanente ta na prome luga pa haya trabou.”

Pa locual ta trata servicio online. El a bisa cu ta trahando riba nan website pa hacie mas moderno. Segun Croes e parti di comunicacion digital ta ‘sumamente importante’ den nan plataforma unda cu ta brinda servicio pa hende por aplica online y nan por wak mas facil cua vacture tin habri y aplica di biaha.

Nan ta bay cuminsa e proceso, sinembargo e ta bisa cu riba medionan social e ta bayendo bon caba, unda comunidad ta bishita y ta haci uso di servicio adicional cu ta yudando. E ta bisa tambe cu nan por acerca nan via telefon y e help center, caminda por comunica cu DPL FaceBook y obtene informacion, sea e dunado di trabou of e buscado di trabou.