E linguista y promotor cultural, sr. Mirto Lacle a informa na Bon Dia Aruba cu tin varios actividad na caminda y cu nan lo tuma luga na Biblioteca Nacional Aruba. E prome actividad lo tuma luga dia 27 di augustus awor caminda e miembro di prensa y reportero grafico, sr. Leo Vrolijk lo realisa e apertura di su exposicion di potretnan Lens di Mi Wowo .
Esaki ta di e nuebe aña consecutivo cu sr. Vrolijk ta organisa e expo aki den cuadro di Dia di Prensa cu ta wordo conmemora anualmente riba 1 di september. E biaha aki e expo aki lo wordo dedica na Maritza Faro-Maduro, Debby Kelly y Gina Werleman kendenan nan tin añanan trahado riba e tereno aki.
Otro actividad cu pronto lo tuma luga na Biblioteca Nacional Aruba tin di haber cu un presentacion tocante e inmigrantenan Portugues na Aruba bou encargo di e Linguista y docente di Papiamento, sr. Mirto Lacle. E ta enfoca mas tanto riba e Portuguesnan di e isla di Madeira cu ta e gran mayoria di e comunidad aki na Aruba, y tambe na Corsou.
Ademas sr. Lacle a laga sa cu full e siman entre 12 te cu 15 di september e lo presenta un trilogia di pelicula riba Frank Martinus Arion di Corsou, Edgar Cairo di Surinam y sra. Astrid Roemer di Surinam pero residencia na Hulanda kende a gana e premio P.C. Hooft cu ta un di e premionan mas grandi otorga na Hulanda
