Ayera minister di Infrastructura, Medio Ambiente y Desaroyo Teritorial, Otmar Oduber a reuni medionan di prensa local pa duna di conoce e ponemento di 4 banki, traha cu material di reciclahe di plastic, na Linear Park y Carnival Village na San Nicolas.
Riba e Dia Internacional di Medio Ambiente celebra ayera, Oduber a papia di loke ta trata e preservacion, e polucion cu ta tuma luga, y p’esey nan tumando accion den dianan aki pa loke ta e autonan cu ta saca huma, y otro diferente forma cu minister a manifesta cu nan kier conscientisa di aspecto di polucion awendia.
Cu e presencia di personal di Serlimar, Bureau City Inspector, DOW y otro departamento cu ta bou direccion di infrastructura y medio ambiente, Oduber a bisa cu nan ta yuda pa conscientisa e comunidad, pero tambe na prome luga pa evita e contaminacion di medio ambiente.
Di mesun manera, el a expresa cu nan a scoge desde aña pasa e proyecto hunto cu e miembronan di Plastic Beach Party, cu ta e reciclahe cu materialnan cu ta dañino pa e comunidad. Oduber a informa cu nan a instala na Carnival Village di San Nicolas y na Linear Park e prome cuater banki produci na Aruba a base di materialnan recicla.
E materialnan di bankinan hopi biaha ta toxico pa medio ambiente, Oduber a comenta tocante e ley cu ta trata di ‘single use plastic’, cual ta na Parlamento y canando henter e proceso, cu segun Oduber a sigura, den dianan aki lo por atende cune, y asina mes a bisa cu ‘Gobierno tin un responsabilidad global, un responsabilidad pa cu nos medio ambiente cu nos mester evita pa crea e tipo di sushedad aki’.
“Nos mester por evita cu e sushi aki ta termina den nos medio ambiente, y nos mester pusha pa reusa mas cu ta posibel e materialnan aki”, Oduber a expresa.
El a informa cu pa produci e bankinan aki, a haci uzo di 800 boter di plastic di detergente, cu a mustra con por reusa y recicla y cu den futuro lo por reduci e sushi produci na e momentonan aki na nivel mundial.
Tambe Oduber a duna di conoce cu Plastic Beach Party ta forma parti di e proyecto cu Serlimar proximamente lo wordo inaugura, esta Upcycle Center, caminda tin e meta pa sigui conscientisa e comunidad cu lo por sigui recicla y reusa materialnan si cu eseynan mester yega te dump.
Di su banda, Christie Mettes di Metabolic Fundacion y Plastic Beach Party a expresa cu nan a traha pa hopi luna pa crea e mashin y traha e bankinan, tur cuater a ser crea cu mas di 3.200 boter di detergente di plastic cu e proyecto a recauda, el a bisa cu nan ta un fundacion cu ta recicla plastic.
Tocante e material, el a sigura cu nan a traha cu 7 tipo di plastic, y nan ta procesa di diferente manera pa por wordo desaroya den productonan nobo.
