Preguntanan a cuminsa surgi tocante con y ki ora nos lo bandona e aislamento y cuminsa surgi despues di e simannan aki di cuarentena pa via di coronavirus, loke algun ta yama ‘e normal nobo’ di nos relacion como personanan.
Line of Life Aruba ta un pagina riba e red social Facebook cu a wordo crea pa trece conscientisacion riba topiconan di salud y bienestar, por medio di comparti informacion cu e comunidad di Aruba di un manera positivo y tambe pa brinda tipnan practico pa cu e topiconan aki. E intencion ta pa crea interaccion entre esunnan cu ta sigui e pagina.
Bon Dia Aruba a tene un entrevista cu nan, den cual a splica con e personanan por deal cu stress na e momentonan aki, Kimberly Maduro, propietario di e pagina aki, a comenta cu ta importante pa trece structura den e dia, door di haci cosnan positivo pa yuda cu e stress cu e temporada aki por bin cune.
Asina mes, el a señala cu ta importante pa cada persona busca algo cu ta yuda nan baha stress, sea ta pinta, wak TV, scucha musica, cushina, traha den cura of un combinacion di esakinan. E structura lo yuda e hendenan pa comparti e dia y sa kico mester haci na cual momento. “Hopi biaha nos ta sinta na cas sin haci nada y mirando cu nos no por sali asina liber mas door di e Shelter in Place y Toque de Queda, esaki por trece stress pa esunnan cu no por ta na nan cas hopi” el a sigura.
Tambe nos ta compronde cu hopi hende a perde trabou, locual tambe ta trece un extra stress pa nan. Pa cu esaki nan ta conseha pa haci adaptacion den e presupuesto cu nan por tin pa luna, kisas busca algo extra pa haci riba nan mes tanten pa gana algo extra di placa y sigui noticia di Gobierno di Aruba, pa asina wak kico ta e cambionan cu a bin y si esaki ta aplicabel pa nan.
Pa mira e situacion aki di un bon manera, manera yuda pa tin un bon salud mental. Hende tin e tendencia di reacciona emocional hopi lihe en bes di reacciona racional riba cosnan cu pasa. “Hopi biaha ta un cambio di mentalidad ta e solucion pa diferente problema”, Maduro a expresa.
Asina mes, el a duna como ehempel e situacion cu nos ta aden awor, nos ta wak e como un tempo caminda nos ta hopi cera den cas sin por bay ningun caminda, mientras cu si ta wak bon, aworaki tin mas tempo pa comparti cu famia y tambe pa dedica na bo mes como persona.
Hopi biaha a wordo scucha loke ta un ‘normal nobo’ cu tambe ta trece algun preguntanan of incognito, di e cual Maduro a declara cu e normal nobo por wordo mira di diferente manera.
Si ta wak e di e manera ‘standard’, e normal nobo lo ta cu lo mester sigui mantene distancia social y keda practica higiena estricto. Di otro banda, e normal nobo ta un oportunidad pa pone enfasis riba e cosnan cu di berdad ta importante y di balor, pasa mas tempo cu famia, dedica mas tempo pa nos mes, sea mas humilde y pa no lubida cu placa no ta tur cos, na final di dia ta ken nos ta como ser humano ta loke cu ta conta.
Pa finalisa, Maduro a manifesta cu durante e temporada aki y pa cu futuro, ta importante pa keda cu calma y positivo den cualkier situacion cu lo por presenta, corda semper cu tur cos den bida tin solucion, cu den dificultad tin oportunidad y cu tur dia solo ta sali di nobo.
