Liña di pregunta Zika contestando varios pregunta di hendenan di afo

– E fin di siman aki lo inicia cu e temporada di campamento. Esaki ta encera hopi hende cerca di otro den areanan comun pa tin sangura. Dokter Maritza Ordonez di Departamento di Salud Publico ta splica un poco con pa preveni di wordo pica pa sangura y tambe ta papia di con ta bayendo cu e  liña pa contesta pregunta cu Despa a institui.

Campamento

Special pa e temporada di campamento pronto Despa lo duna mas informacion den medionan di comunicacion, sinembargo Sra. Ordonez a menciona algun tip durante di un entrevista cu nos matutino. El a bisa cu e ta importante pa personanan cu ta bay ta banda di lama, mangel, mata entre otro pa haci uzo di repelente. Unda cu por, ta bon pa haci un “fogata” pa e huma core cu sangura y bisti paña manga largo, esaki ta conta specialmente pa hendenan grandi y chikito. Den oranan di atardi e sanguranan ta pasa di un banda pa otro pues ta atento y purba uza repelente. “No laga personanan grandi cu no ta move mucho, sinta un caminda su so sin proteccion,” Sra. Ordonez a splica.

Sra. Ordonez cu ta encarga cu e liña di telefon institui pa Despa pa contesta pregunta tocante Zika.

“Mi ta haya cu na prome instante (e prome dos simannan) mi a haya hopi yamada, uno mas interesante cu e otro pero tur interesante. Sinembargo, den e ultimo siman aki e cantidad di yamada a baha, mi no sa si tabatin di haber cu e furor di dia di Himno y Bandera y e dianan liber pero desde diamars siman pasa mi no a ricibi ningun yamada.”

Preguntanan di bishitantenan

Anteriormente mi a haya varios yamada di Merca, y di personanan cu tabata bin Aruba pa diferente motibo, entre nan recientemente un pareha pa “honey moon” y un mama biniendo cu yiunan y tabata puntra riba e riesgo pa un persona fertil den caso cu e sali na estado. Kico Aruba ta ofrece na hendenan cu bin Aruba pa loke ta e asunto di Zika y si acaso Aruba por garantisa cu e persona no ta bay bek cu Zika, Sra. Ordonez a splica.

“Pa tur eseynan nos tin contesta tambe basa riba e plan nacional cu nos tin di Zika. Di acuerdo cu esey nos ta contesta cu nos no por garantisa cu ningun sangura ta bay pica un persona. Mi ta hopi cla cu hende di afo cu nos tin bon plan y ta duna hopi bon recomendacion, nos tin “checklist” na aeropuerto y hotel y tambe e liña di telefon pa contesta cualkier pregunta y duna conseho. Pues mi ta duna tur conseho pa nan bin y tambe pa medidanan pa minimalisa e chens pa wordo pica pa un sangura.” Segun Sra. Ordonez ta splica e ta percura pa e persona cu ta yama ta keda satisfecho cu tur contesta y informacion ricibi specialmente na hendenan di afo pasobra tin hopi speculacion ta wordo haci. Manera entre otro cu Aruba tin hopi cantidad di caso di Zika, pues ta splica nan cu esaki no ta e caso y cu tin actualmente 17 caso di Zika di cual mayoria ta importa y cu e prome caso tabata importa di paisnan cu tin mucho mas hopi caso compara cu Aruba. Tambe mirando e magnitud di e malesa na otro pais, Aruba ta mantene un cantidad di caso hopi abou. “Esaki ta nifica cu e trabou cu Aruba ta haciendo ta efectivo. Na momento cu nos wordo notifica di un posibel caso, nos ta pone e plan den accion sin cu haya resultado positivo, esaki no ta importante pa e accion tuma luga. “Pues manera cu wordo notifica, GKMB ta bay na e cas, ta analisa e caso y wak si e persona a biaha recientemente pa despues spuit paden pafo y den bisindario pa minimalisa e chens cu si tin sangura cu Zika, e ta sali bay pica otro hende.”

Preguntanan di hendenan local

Preguntanan cu ta ricibi di personanan local ta unda otro por haci un aviso den caso cu dokter di cas no ta posibel pa wak e pashent  mes ora. “Nos ta conseha pa yama Despa di biaha pa e proceso anteriormente menciona di GKMB cuminsa cana y pa nos duna recomendacion. Pasobra unabes e persona a wordo pica caba y ya tin e virus, mucho mas no por wordo haci. A menos cu ta un persona grandi cu problema cronico acerca of mucha chikito bou di dos aña cu a nace cu algun problema y cu e virus d Zika e lo por haya complicacion, Sra. Ordonez a splica. P’esey ta enfoca riba e importancia di Despa cu ta pa minimalisa cu e sangura cu ta infecta pasa pa otro hende. Na mes momento ta tuma tempo pa bisa e personanan cu yama pa wak den nan cura si nan tin potoshi pafo, pa nan piki esakinan y controla den cura pa articulonan cu por wanta awa aden unabes cu awa yobe y si tin boshi mata pa corta esakinan. Ainda tin cantidad di test pendiente na Hulanda pues mester wak si tin mas caso di Zika den esakinan, pero  locual ta resalta ta e cantidad di casonan di Dengue. Tambe local nan ta puntra si ya tin vacuna of tratamento contra Zika y consehonan pa prevencion.

Si kier mas informacion of tin cualkier pregunta no duda di yama 597-5000 cu ta e number cu Despa a institui pa cualkier pregunta di esun mas chikito pa esun ma complica.