(NLTimes) – Provincia di Limburg lo investiga e seguridad di hende muhe riba transport publico. Esaki ta bao peticion di e Conseho Provincial, cual a acepta un mocion di partido PvdA.
E estudio tin e meta di haya sa con safe hende muhe ta sinti riba transport publico y na stacionnan ademas di ki medida mester por tuma pa mehora nan seguridad.
E programa di television Pointer y e corant AD recientemente a haci un encuesta na miles di persona Hulandes puntrando den cua luganan nan ta sinti insigur. Mas di 7,400 muhe a participa den e encuesta y 91 porciento a bisa cu nan ta sinti insigur riba transport publico, cual por ta metro, trein of bus. Pointer a reporta cu 90 porciento di e participantenan tambe ta sinti insigur den mondi y parkenan. Esaki a causa cu parlamentario di PvdA Aleida Berghorst a haci yamado na su provincia pa ehecuta e encuesta aki tambe.
“E ora nos por puntra hende muhe: kico bo tin mester pa haci e stacion sinti mas safe pa bo? Nos no lo soluciona e problema cu e proposicion aki, claramente. Pero si nos por preveni sikiera 1% di e casonan cu medidanan hopi simpel, nos no mester fracasa den haci esaki,” Berghorst a bisa.
Sinembargo, no ta tur partido a reacciona cu entusiasmo pa cu e investigacion. PVV y Forum voor Democratie a considera un encuesta entre solamente hende muhe innecesario, mirando cu “tur hende mester sinti safe riba transport publico.” Lider di partido Bart Megens a bisa cu un miho manera pa combati esaki ta di “combati e fuente di e strobamento,” cual den su opinion ta “mas tanto solicitantenan di asilo.”
Megens a haya reaccionnan cu tabata disgusta for di e camber nacional, incluyendo di Comisario Real Emile Roemer, ken a expresa cu e “no ta kere esey ta aceptable y ta distancia mi mes di esey.”
E mocion a keda adopta cu 31 voto pro y 14 voto contra.
