Lilian Semeleer su hubileo di plata na BNA: Biblioteca semper lo keda pa complementa informacion pa enseñansa

25 aña pasa, Lilian Semeleer a drenta na servicio di Biblioteca Nacional Aruba (BNA). Actualmente e ta directora interino di e instancia importante aki pa loke ta acceso na informacion y conocemento.

El a bisa cu den transcurso di mas cu dos decada, e trabou y servicio cu biblioteca ta ofrece a conoce un evolucion y cambionan relevante. Sinembargo e ta sinti cu e tempo a pasa demasiado rapido p’e. “Pa mi ta manera cu ayera ma cuminsa,” el a bisa cu un sonrisa durante un entrevista cu Bon Dia Aruba.

Innovacion.
E realidad ta cu ya caba a transcuri un kwartaal di un siglo for di tempo cu Lilian a cuminsa traha. “Hopi cos a pasa nos dilanti. Hopi cambio pa loke ta trata innovacion di biblioteca.” Den cuadro di aña 2020 cu a wordo decreta pa gobierno como aña di Innovacion y Enseñansa, BNA ta hunga un rol importante den e proyeccion aki.

Por ehempel nan tin un laboratorio tecnologico, of loke nan ta yama B-lab Makerspace, pa tur cu tin gana di experimenta por haci uzo di dje. Specialmente nos hobennan tanto pabou como pariba di brug.

Awe Biblioteca Nacional Aruba ta conta cu departamento cu por ta nunca nan a yega di imagina cu lo tin den nan instalacionnan, manera B-lab Makerspace, Centro di Informacion Digital y departamento di Media.

Generalmente bo ta spera cu den un biblioteca, bukinan so nan tin. Pero BNA a duna un stap importante riba tereno di innovacion reconoci pa Acuril (Association of Caribbean University, Research and Intitutional Libraries). Den nan departamento di B-lab Makerspace bo ta wak tur sorto di instrumentonan.

E makerspace ta duna acceso publico na varios mashin pa fabricacion digital, incluyendo 3D printers, laser cutter, vinyl cutter, CNC cutter, como tambe ‘programmable boards’ manera Arduino y Raspberri Pi. Sinembargo tambe nan tin instrumentonan mas tradicional y convencional pa traha, manera drill press, bench sander, planner y table saw.

E ta haya cu e cambionan aki a tuma luga den varios etapa. Mayoria di e procesonan digital, Lilian a forma parti di dje como ICT. Esaki ta BNA su sistema di computer y nan sistema di librarian.

Clientenan y generacion nobo.
Pero e no solamente a wak cambionan den nan servicio y riba loke BNA por a ofrece na nan usuarionan. Sino cu Lilian por a mira un cambio di generacion den nan clientenan, mayoria di nan hendenan jong.

E ta haya cu antes nan clientenan tabata puntra mas hopi. Pero awendia no, muchanan ta mas auto-suficiente. “Nan mes sa con pa busca caba,” el a bisa. Tambe e ta agrega cu nan preguntanan ta hopi mas directo. Antes pa tur cos bo mester busca den bukinan, pero awendia cu e mundo digital, el a bira hopi menos.

BNA ta conta cu un Centro di Informacion Digital cu ayudo di Setar. Nan ta den implementacion di nan sistema automatisa nobo, unda publico lo tin acceso na e-books. Nan lo sigui profundisa y traha riba digitalisacion. Un bon noticia ta cu pronto nan ta bay haya computer nobo pa asina nan por ta miho ekipa.

Deseonan.
Den cuadro di su hubileo di plata, Lilian Semeleer no kier cay den nostalgia y tampoco e kier bay mucho den pasado. “Pa mi loke a pasa a pasa y mi ta bay wak pa futuro. Pa wak kico tin nobo pa bo por ofrece e hubentud.”

E ta un reto constante pa BNA mantene e interes di nan clientenan pa bishita nan instalacionnan. Specialmente cerca nos generacion nobo, pa asina nos hubentud por keda bin cerca nan.

E ta consciente cu danki na tecnologia nos hubentud tin acceso directo na cierto informacion. Pero e ta haya cu bo ta keda cu e buki pa gran parti di nos poblacion. Te ainda nos scolnan ta uza buki gewoon, y esaki ta garantisa cu nan ta sigui cu nan bukinan convencional. Pero logicamente e ta consciente cu mester complementa e parti di hard copy cu esun di digitalisacion. “Den principio, cambio no ta bay tin mucho pa loke ta trata biblioteca,” el a bisa.

Un deseo cu Lilian tin den cuadro di su hubileo di plata ta, cu e kier mira un exposicion. Igualmente patras di biblioteca tin un espacio basta grandi cu nan kier expande pa asina trece e parti di ArubianaCaribiana bek cerca nan edificio central na George Madurostraat. Tambe e lo desea mas espacio den sala di estudio pa nos muchanan.

Semeleer ta considera cu biblioteca ta keda existi keto bay pa largo tempo. Sinembargo por ta e cantidad di material lo mengua pa via di e buki digital of e-books. “Pero nunca e ta bay caba, pasobra semper bo mester di dje pa complementa informacion pa enseñansa.”