Ayera madruga tabata tin un tiramento fatal na Olde Molen cu a tuma bida di hoben Ralph de Palm di 26 aña di edad, naci na Haiti. Segun algun fuente cerca di e victima, ta trata aki di posibel reglamento di cuenta relaciona cu problema di droga.
Segun un persona cu a identifica su mes como amigo di e victima ta conta Bon Dia Aruba, cu Ralph de Palm tabata bayendo riba e caminda robes y tabata tin yen di problema. E conoci di e victima ta splica nos cu e victima tabata tin problema cu ta posiblemente liga cu droga; debe of reglamento di cuenta. E conoci no por a bisa nos nada mas y a desea di keda anonimo. Nada di esaki ta confirma cu autoridadnan mirando cu investigacion ainda ta andando.
Version policial
Diadomingo madruga pa 4:28 central di polis ta haya un yamada na unda na prome instante ta bisa cu lo tin tiramento banda di Olde Molen. Ta manda patruya di biaha na e sitio . Na yegada patruya di polis ta topa cu un hende homber drumi abao y cu varios tiro na su curpa riba e parkeerplaats di e club. Di biaha a pidi pa ambulance cu urgencia ya cu e persona no tabata duna señal di bida. Ambulance ta yega na e sitio, pero no por a haci nada mas pa sr. De Palm. Dokter a constata morto pa 5:30 anto fiscal a laga confisca e curpa.
Sospechoso mira
Recherche y departamento forensico ta haciendo nan investigacion pa saca afo kico exactamente a pasa y ken (nan) por ta e responsabel. Tin testigonan cu a mira e sospechoso bandona e sitio y a notifica den cua auto esaki tabata ta.
Mas tiramento na Olde Molen
Na december di 2015 a sosode un asesinato na Olde Molen unda bouncer Aldwayne Damian a bira victima di un tiramento. Esaki ta e caso conoci di e sospechoso principal Milangelo “Yellow” Trenidad cu a tira mata e bouncer y herida un otro persona. Manera cu nos a informa riba e caso aki, despues di algun siman cu autoridadnan tabata buscando e sospechoso Yellow, a logra detene y hues conden’e na 18 aña di prizon.
Ta asina cu e localidad aki tin basta problema unda mayoria di biaha mester intermediacion di polis. Varios hende a comenta por ehempel cu mester cera e localidad aki pasobra e ta trece problema so. Bon Dia Aruba por a tuma nota di diferente comentario cu a surgi riba rednan social despues di e asesinato aki ayera relaciona cu orario di cera di e luga.
Otro hende ta comenta cu mester stop di culpa e luga pasobra esunnan cu tin problema cu otro por bay regla esaki na unda cu ta. Pero tambe tin cu ta bisa: ” Cuanto persona mas mester keda mal bati door di bringamento, herida door di tiro, mata, mal hinca etc pa asina instancia concerni por bay na trek e licencia pa keda habri te den oranan di mainta na Olde Molen?”
