(AP) — Lidernan Arabe ayera a conclui e di 31 cumbre di e conferencia Arabe anual di mas grandi despues di busca pa cera e distancia riba varios asunto divisivo den Medio Oriente y Africa. E prome reunion di Liga Arabe den tres aña a tuma lugar den marco di aumento di inflacion, escasez di energia y cuminda, secura y e costo altisimo di bida na e region.
Rey, emir, presidente y prome ministernan a discuti varios asunto dificil durante un reunion di dos dia na e capital Algiers. Entre nan tabata establecimento di lasonan diplomatico entre Israel y cuatro pais Arabe, mientras ex-prome minister Israeli, Benjamin Netanyahu y su aliadonan di ultra-derecha ta parce di ta yegando victoria den eleccion.
E discusionnan durante e cumbre tambe a enfoca riba e crisis di cuminda y energia agrava pa e guera di Rusia na Ucrania. E conflicto tin consecuencianan devastador pa Egipto, Libanon y Tunisia, entre otro paisnan Arabe luchando pa importa suficiente trigo y combustible pa satisface nan poblacion.
Lidernan Arabe a reconoce e consecuencianan precario di e guera pa nan nacionnan, y un tras di otro a haci yamado pa ‘accion Arabe colectivo’ pa enfrenta retonan comun, pero no a presenta detaye di un potencial mecanismo cu lo yuda alimenta nan pueblo.
Profundisando e crisis ta e pio secura den varios decada cu a afecta Somalia, un di e miembronan mas nobo di Liga Arabe, treciendo algun area di e pais den borde di hambruna. Reduccion di suministro di grano tambe a profundisa hamber na Yemen, e pais mas pober na mundo, despues di ocho aña di guera civil. Segun calculacionnan di Nacionnan Uni, mita miyon di mucha Yemeni ta severamente malnutri y mas di dos tercer parti di e poblacion mester asistencia humanitario.
E guera na Ucrania a profundisa miseria na Yemen, ya cu e pais oost-Europeo tabata suministra 40 porciento di grano na Yemen prome cu invasion di Rusia.
Reportahenan for di Turkia ayera a bisa cu Rusia a bay di acuerdo pa bolbe na un acuerdo media pa Turkia y ONU cu ta permiti pa manda miyones di ton di grano Ucraniano door di Lama Preto. Esey por duna un tiki alivio pa lidernan Arabe luchando cu aumento den prijs di cuminda y escasez di productonan basico.
E cumbre di Liga Arabe a duna un oportunidad pa Algeria – e teritorio mas grandi na Africa – pa mustra su liderazgo den mundo Arabe. Algeria ta un productor mayor di petroleo y gas y ta percibi pa nacionnan Europeo como un proveedor clave memey di e crisis global di energia. Algeria, hunto cu otro pais Arabe ta keda fuertemente contra e serie di acuerdonan di normalisacion cu Emiratonan Arabe Uni, Bahrain y Maroco a firma cu Israel durante ultimo tres aña, cu a dividi e region den dos campo. Sudan tambe a bay di acuerdo pa establece lasonan cu israel.
Presidente Algerio, Abdelmadjid Tebboune a urgi miembronan di e liga pa reafirma nan sosten pa Palestina den nan conflicto cu Israel, mientras atencion di comunidad Arabe y internacional ta move na otro conflicto y crisis.
Luna pasa, Algeria tabata anfitrion di negociacionnan den un intento pa caba cu e division politico na Palestina y reconcilia e partido Fatah, kende su Autoridad Palestino ta goberna algun parti di West Bank, y e grupo militante Hamas, cu tin control di e Gaza Strip.
E cumbre Arabe a tuma lugar memey di tension aumenta den West Bank, unda ehercito Israeli a haci arestonan y inval anochi den buskeda di militante Palestino. A mata decenas di Palestino den lunanan recien, incluyendo militantenan arma, adolescentenan tirando piedra, y hende cu no tabata involucra den e violencia.
E 22 miembro di Liga Arabe a tene su ultimo cumbre na 2019 prome cu e brote di pandemia di coronavirus.
