Amienda
Den un intento pa tene tur hende contento lider di fraccion di AVP a haci algun declaracion cu merece atencion di acerca. Pa cuminsa ta wordo bisa cu e amienda nobo ta laga matrimonio entre homber y muhe intacto. Esaki ta un admision cu e amienda original tabatin intencion di cambia definicion di matrimonio. E amienda original a propone pa cambia ley cu ta bisa cu matrimonio ta entre un homber y un muhe pa matrimonio (y union civil) ta entre personanan. Mas cu claro personanan ta inclui homber cu homber y muhe cu muhe. Realidad ta cu si bo duna parehanan homosexual e mesun derecho cu hende casa, den practica, bo a legalisa matrimonio di mesun sexo.
Derechonan
Lidernan religioso nunca por ta di acuerdo pa legalisa loke Palabra di Dios ta prohibi. Sr. Herde no por papia pa lidernan religioso. Loke esnan cu ta bringa pa aproba e amienda kier logra ta, cu hende cu ta biba hunto ta wordo reconoci igual cu hende casa. Si parehanan kier e mesun derecho cu hende casa, simplemente laga nan casa. Kico ta stroba parehanan heterosexual cu ta compaña pa haya e mesun derecho cu parehanan casa? E echo cu nan no ta casa! Si nan bay hues pa exigi mesun derecho hues lo bisa nan cu nan tin e opcion legal pa casa. No ta parehanan heterosexual ta bringa pa union civil, sino un grupo chikito di intelectual homosexual.
Union civil
Kico ta stroba parehanan homosexual pa haya e mesun derecho cu parehanan casa? E echo cu ley di Aruba no ta reconoce pareha di e mesun sexo como matrimonio. Es mas, leynan di Corte Europeo di Derecho Humano ta bisa matrimonio homosexual no ta un derecho humano. Es mas, e mesun Corte aki ta bisa cu no ta discriminacion si gobierno nenga parehanan homosexual e derecho di casa. Parehanan homosexual tin tur oportunidad pa regla nan asuntonan legal via notario sin cu nos mester bay introduci union civil den nos Codigo Civil.
Sr. Herde
Señor Herde a uza ehempel di un famia bisiña den su infancia pa trece un toke emocional na e discusion. Emocion no tin luga den e discusion aki. Nos leynan ta cla, no tin espacio pa legalisa bibamento hunto, ni di pareha heterosexual, ni di parehanan homosexual. Como lidernan religioso nos ta distancia nos mes for di e declaracionnan di Sr. Herde. Nos no ta aproba legalisacion di bibamento hunto. Sr. Herde no por papia pa lidernan religioso.
