E proceso di forma siguiente gabinete ta canando keto bay. Manera nos a trece dilanti caba, gobernador di Aruba, su excelencia Alfonso Boekhoudt, a ricibi e prome documento for di informador diabierna merdia 5 di october. E informador sr Arie Swaen, a cuminsa traha riba e rapport riba 29 di september. Ayera lidernan di partidonan MEP, POR y RED mester a presenta un rato cerca gobernador pa consulta riba e prome trabaonan haci por medio di e informador. A finalisa e prome ronda di informacion pa awor bay pa e siguiente paso.

MEP: ‘Nos mester tuma nos tempo’
Lider di partido Mep Evelyn Wever Croes a bisa cu te cu aworaki e conclusion ta cu e tres partidonan cu a duna indicacion di por traha den base amplio, keto bay ta e direccion cu nan kier bay (MEP, POR cu RED). “Un djis ora drenta fase di formacion ta na partidonan pa yega na otro riba un acuerdo di gobernacion y eventualmente reparticion di carteranan.

Esaki ta un proceso serio cu mester tum’e den hopi responsabilidad y trankilidad. No mester laga nada ansha nos. Ademas nos mester tene cuenta cu nos ta bay tin tres siman ainda sin un parlamento nobo.” Evelyn ta subraya cu ni cu keda cla mañan mes no por forma gobierno nobo mesora. Mester laga parlamento sinta anto e parlamento nobo lo nombra e gobierno nobo, no tin ningun manera di haci esaki menos cu tres siman.

“Nos mester tuma nos tempo. Berdad tin retonan nobo cu a bin dilanti y ta cosnan cu bo no por haci mucho cu nan.” Partido MEP a laga sa tambe cu si nan logra drenta gobierno nan lo kier naturalmente cumpli cu tur e palabracionnan riba e parti financiero cu tin pa pais Aruba. Pero segun sra. Wever Croes: “Mirando e situacion cu nos ta haya nos aden aworaki e ta bira poco dificil pa yega drenta y cumpli di biaha. Kiermen den esey nos ta pidi un poco pasenshi di CFT tambe pa esaki. Nan ta compronde si e situacion cu nos ta aden aworaki y mi ta sigur cu nos lo por yega na palabracionnan al respeto.”

Riba coalicion, sra. Wever Croes a bisa cu na final di dia loke nan a bay na campaña cu ne ta nan compromiso cual nan lo a cumpli cu ne si lo a haya mayoria absoluto. Evelyn: “Na momento cu bo tin cu forma un coalicion semper bo tin cu tene cuenta cu bo partnernan den coalicion. Si nos bay den esaki – gobernador y nos a bisa esaki mas cu un ocasion – e mester ta algo duradero cu ta bay dura pa cuater aña. P’esey ta hopi importante di adelanta pa haci palabracionnan concreto riba e puntonan ey pa ta sigur cu bo tin un base di gobernacion amplio y stabiel. Tampoco nos no por yega na ningun palabracion sin bay bek na nos militancia pa mira kico nos ta bay pe of no.”

POR: “Porcentahe sumamente halto den igualdad cu otro partido”
Lider di partido POR Otmar Oduber a bisa cu e base ta cu tin un gobierno sigur di 11 minimo entre partido MEP y POR. Kier purba amplia esaki mas cu ta posibel y partido RED a mustra disponibilidad.
“Y nos a mustra riba e echonan cu tin puntonan pa combersa. Tin puntonan di principio cu nos partido ta para riba dje y cu nos mandato cu tin na momentonan aki di partijraad ta condiciona na cierto puntonan.”

Sr. Oduber a remarka cu den nan programa nan a pone atencion riba varios punto cu a bin dilanti mediante encuesta y diferente encuentronan cu tabata tin cu instancianan for di januari caba di e aña aki. Sr. Oduber ta bisa cu e ta convenci ora mira programanan di partido MEP y cierto forma tambe di partido RED, tin apertura pa papia riba e topiconan di importancia pa comunidad. “Y tin otro topiconan cu nos mester combersa riba nan cu no lo por forma parti en todo caso di un posibel plan di gobernacion pa e siguiente cuater añanan.”

E ultimo combersacion cu partido MEP tabata basta ameno segun sr. Oduber siman pasa diahuebs, unda por a mira un foto circula di ambos lider riba rednan social. “E proceso di informacion a wordo respeta. Nos a informa otro riba kico e disponibilidad ta y bao cua condicionnan nos ta dispuesto pa papia y traha cu otro. Tin condicionnan cu lo bira parti di e discusionnan durante e proceso di formacion. E tres partidonan cu ta bay drenta den formacion a laga un porta habri sea hancho of menos hancho pa combersa cu otro. Esey ta e motibo cu nan tres ta bay drenta e fase di formacion. Y naturalmente na mesa lo papia e ora riba pakico e porta ta menos hancho of no.” Sr. Oduber a sigui bisa cu tin un porcentahe sumamente halto di cosnan cu si nan ta mira cu nan tin den igualdad cu e otro partidonan.


RED: “Nos ta un stap mas leu”
Ricardo Croes lider di partido RED Democratico a laga sa cu ya a tuma combersacionnan informal entre su persona y sr. Oduber y Andin Bikker. Tambe a tuma luga combersacionnan entre su persona y lider di e partido geel y su partijraad. Tur combersacion riba un base pa sondea kico ta e cosnan cu nan tin en comun cual tur ta liber di tur compromiso segun sr. Croes.

“Un coalicion ta encera cu nos lo haya un ministerio pero cua ministerio esaki lo ta na e momentonan aki no ta conoci ainda. Esaki no ta un topico di discusion te na momentonan aki. E dia crucial tabata ayera pa tur partido por a ricibi opinion di gobernador y informacionnan relevante pa formacion di un gobierno nobo. Partido Red ta e partido invita pa forma parti di e gobierno aki, no esun den posicion pa forma e coalicion aki.

Sr. Croes ta sigui bisa, “Nos ta un stap mas leu. Siman pasa nos tur a ricibi informacion relevante pa cu pais Aruba riba diferente tema. Tambe cualkier punto cu por ta separa e partidonan a bin riba mesa. Nos por a contesta e preguntanan aki cu satisfaccion na informador y asina tambe na gobernador. Cu ta duna e impresion cu tin un base amplio. Anto e ora nos por bay over na e stap aki cu ta bay un tiki mas cerca mes di forma un acuerdo di gobernacion, cu ta e proceso di formacion. Pues sin informacion, ta dificil pa bo tuma cierto decision cu ta importante y relevante pa e acuerdo di gobernacion.”

Esey ta pone cu e reunion di ayera tabata asina special segun sr. Croes mirando cu nos ta yegando mas cerca pa un gobierno nobo.