Cu excepcion di reforma di belasting, e ekiponan encarga pa ehecuta e reformanan ta cumpliendo cu nan obhetivonan y e proceso ta cana bon. Asina Parlamento a keda informa ayera. Prome Minister Evelyn Wever Croes ayera a habri e reunion di Parlamento unda a duna Parlamentarionan un bista riba e progreso di ehecucion di e landspakket.
Prome Minister a bisa cu e landspakket, firma cu Hulanda na November 2020, tin como meta pa no solamente yuda Aruba ‘bounce back’ despues di e pandemia di COVID-19, pero “’bounce forward.’ Nos mester yega na un pais y economia mas fuerte.”
E agenda di ehecucion pa e ultimo kwartaal di 2022 ta cla, pero ainda no a keda publica na Hulanda, como tal no por publica esaki ainda. “Pero nos ta traha riba dje si.”
E prome mandatario a Cada trekker di e grupo di reforma tabata den Parlamento pa duna un ilustracion di e trabaonan, cu ta necesario pa no solamente bounce back sino bounce forward, manera Prome Minister Evelyn Wever a señala. “Pasobra mester yega na un economia y pais mas fuerte.” Mr. Wever ta enfatisa cu aunke cu Hulanda no a aproba publicacion di e di cuater agenda di ehecucion, a cuminza traha riba dje caba. Mayoria di e trabaonan ta canando bon, a pesar di e reto di capacidad, ya cu ta e mesun hendenan sinta den Parlamento ta encarga cu percura cu ta cumpli cu e agenda.
E persona encarga pa tira bista riba e proceso ta drs. Indra Zaandam, kende ta forma parti di e Tijdelijke Werkorganisatie, TWO pa Aruba. E ta e persona encarga pa comunica cu Hulanda. E otro personanan cu ta responsabel pa cada segmento di e landspakket ta Roland Pan di CAD,…Helder di CBS pa e tema di Maneho Financiero; Omaira Lares ta carga e tema di Costo Sector Publico; mr. George Croes ta carga e proceso di Sector Financiero. E reforma economico ta uno amplio y ta parti den cuater area cu ta carga pa mr. Glendeline Croes di Ministerio di Labor, Adrienne Fraser di Ministerio di Husticia, Yvonne Lee Perez di Direccion di Labor y Investigacion y Maria Dijkhoff Pita di Direccion Economico, Comercio y Industria. Inspector di Enseñansa John Hessen ta responsabel pa realisa reforma den enseñansa; Herman Fransen y Edson Jacobs ta responsabel pa e reforma den Fortificacion di Estado di Derecho; mientras cu Arlene Ellis Schipper ta carga tema di reforma di Salud Publico. Durante e reunion ayera, esnan encarga cu e tema di Belasting (red. cu netamente ta e area unda Aruba no ta cumpli cu e metanan stipula) no por tabata presente, aunke cu Zaandam por a splica e proceso na Parlamentarionan. “No por implementa e landspakket den un dos tres.” Segun Prome Minister, nan ta esnan cu miho por splica e detayenan y tambe e complehidad di e trabaonan.
Drs. Zaandam a splica Parlamento e sistema cu ta usa, pa e 63 accionnan di e 8 temanan di e landspakket, cu “ta haya su origen den e areglo mutuo di November 13, 2020,” drs. Zaandam a bisa. E ehecutivo a splica cu Aruba tin otro forma pa traha. Corsou por ehempel tin un comision di reforma, pero Aruba a scoge pa pone e peso di contenido riba experto local, manera Director y conseheronan di Ministernan. “E TWO ta punto di contacto pa Gobierno di Aruba cu TWO Nederland, cu de facto ta ‘COHO in oprichting.’” Den esaki tin ekiponan cu a y ta hiba discusion fuerte riba contenido, ta sinta cu e team di ambtenaar pa midi progreso. Nos semper kier trece punto pa situacion local. TWO tambe tin contacto cu Ministernan.” Zaandam a ilustra e embergadura cu tur e personanan encarga cu percura cu ta cumpli cu e accionnan di e landspakket tin, ya cu nan ta responsabel pa nan trabaonan diario tambe.
“Awor cu ta bay den fase di implementacion tin su consecuencia pa capacidad local,” Zaandam a ilustra, agregando cu si ta papia di reforma y medida, por mira kico nan ta. Locual ta importante, ta cu e medida di cada seccion ta e reforma mes cu ta sigui den tempo. Ora cu a conclui e trayecto, y ta den e agenda di ehecucion, “ esey ta locual ta evalua Aruba na dje, esta si a entrega e producto na tempo of si tin otro motibo pakico no a logra. E parti di conclusion ta basta esencial.’”
Indra Zaandam a splica ehempel di e reportahe di ehecucion, cu ta secuencia di evaluacion, unda ta usa colornan berde, geel y cora, cu ta indica ki ora ta bayendo bon y ki ora mester atencion di maneho. “E productonan di e landspakket, cu ta entre otro e investigacionnan, ta keda publica despues cu nan pasa den Conseho di Minister. Por haya nan riba website gobierno.aw of website di COHO.” Ademas, Secretario di Estado pa Asunto di Reino ta comparti e reportahe di ehecucion cu Tweede Kamer. Den otro palabra, tin tur transparencia den e proceso.
Zaandam tambe a duna algun splicacion specifico riba reformanan, manera seccion 2 di tema B, cu ta Efectividad di Sector Publico, cu ta inclui un investigacion riba entidadnan publico, pa mira si e participacion publico ta tuma luga den forma eficiente. E investigacion ta tuma luga hunto cu e ekipo di Hulanda, PWC Hulanda. “Denter di poco tin mas informacion riba e rapport final cu mester keda trata den Conseho di Minister.” Seccion 11 di e tema B tin di haber cu digitalisacion y a cuminza encamina e proceso pa mira con digitalisacion lo optimalisa e reformanan.
A mustra Parlamentarionan cu e proceso di hisa efectividad di e aparato publico cu ta tema B, en todo caso no ta dirigi na e momento aki pa reduci e personal. Awor kier formalisa e proceso y forma structura. E enfoke ta riba e area di calidad unda trahadonan segun e trabao ta rekeri, lo haya specialisacion necesario. “No ta papiando aki riba e cantidad di hende. Pero tin tambe e realidad di Producto Interno Bruto, PIB,” Zaandam a ilustra, referiendo riba e hecho cu e gasto publico no por ta mas cu 10 porciento di e PIB. Esey ta e palabracion cu tin cu Hulanda, “pero por yega na dje na diferente forma. E enfoke awor ta calidad. Mescos ta conta cu digitalisacion.” Awor ta den e fase preliminario pa mehoracion di calidad, Zaandam a splica.
Bon Dia Aruba lo amplia riba e presentacion y contestanan di e diferente ehecutivonan publico riba nan trabao pa cumpli cu e landspakket.
