Dialuna ultimo, Camara di Comercio di Aruba (KvK) a organisa un conferencia di prensa tocante e ultimo desaroyo di e debate politico cu nan ta organisando pa mañan diahuebs pa 7’or anochi den e ballroom di Marriott Hotel .

Presente den e conferencia aki tabata cuater di e shete lidernan di e partidonan cu ta participa den e debate aki, nan tabata Holmo Henriquez di MAS;  Benny Nisbet di PPA;  Ricardo Croes di RED y Candelario “Booshi” Wever di UPP. Cada un di nan  a trece brevemente nan punto di bista tocante  nan expectativa riba e debate aki; y kico nan kier trece dilanti den nomber di nan partido.

Lidernan politico

Cada un di e lidernan a haci un invitacion pa por  pesencia e debate aki ya sea personalmente of via Tele Aruba cu ta bay transmiti live. Sr. Herinquez a bisa cu ta importante pa pueblo haya sa kico ta e plannan cu nan kier trece dilanti. P’esey e ta spera cu den e debate aki nan por haya oportunidad pa trece nan plannan dilanti. E  ta considera cu e problema cu nos pais ta pasando aden ta multifacetico. E ta consciente cu ta dificil cu nan por bay splica den poco tempo henter e problematica y solucion di nan.

Sr. Croes di RED a bisa cu nan ta participa den e debate cu e intencion di trece pa dilanti e posibel solucion pa atende e problemanan di nos pais. P’esey pa nan ta importante pa henter nos pueblo enfoca riba e debate aki; enbes di enfoca riba bandera y sticker. “Aruba ta den caos laga esaki no ta un secreto  pa bo”, el a bisa. E lider di RED a indica cu nos pais no tin democracia; ya cu e berdadero democracia lo ta si Aruba su parlamento ta di Aruba, ya cu durante e ultimo 16 aña nos a conoce un dictadura.

Di parti di PPA, su lider Benny Nisbet a gradici KvK cu a haci posibel e debate aki. Tambe el a indica cu nos democracia ta jong pues e tin apenas 31 aña cu Aruba a haya su Status Aparte.  E ta kere cu e tipo di debate aki ta yuda pa engrandece e democracia Arubano. Ya cu liber di tur influencia cada un por forma su propio pensamento pa asina un pueblo por dicidi kende lo bay goberna y representa e pueblo aki den Parlamento.

E veterano politico, Candelario “Booshi” Wever di UPP a duna palabra di danki na KvK ya cu un debate politico den principio no tabata e idea; pero e gremio comercial aki a dicidi di organice tog. Sr. Wever a bisa cu e “partido adulto” ta bay demostra diahuebs awor, nan esencia y importancia. E ta lamenta y expresa su solidaridad cu e otro partidonan (ABO y CURPA) cu “no a haya oportunidad pa nan por participa”. El a bisa cu UPP su fundamento ta basa den bon gobernacion; y tur factor tanto di gobernacion como di economia, etc.. mester draai rond di esaki. “Si esaki no ta draai manera mester ta, abo ta haya problema den tur sector”, el a bisa.