Liderazgo nobo na KPMG Dutch Caribbean y na oficina di Aruba

Mientras cu na nivel di Caribe Hulandes a bin cambio den liderazgo den KPMG, aki na Aruba tambe tin un lider nobo na cabes di e oficina local. Cu esey KPMG ta cla pa sigui desaroya y alcansa e siguiente nivel di crecemento den e mercado di Caribe Hulandes.

Desde dia 15 di juli 2015, Raymond Begina a bira e Presidente nobo di KPMG den Caribe Hulandes y Surnam. E tin un trayectorio largo di liderazgo den KPMG, cu un conocemento amplio den e industria di “consultancy”. E ta partner den e departamento di “Advisory Services” na KPMG DC&S y tabata responsabel tambe pa asuntonan comercial.

E nombracion di Raymond Begina como Presidente a bin ora Lindomar Scoop a baha for di e funcion, despues di 5 aña na timon di e organisacion. E ultimo aki ta un partner tambe den KPMG DC&S den e departamento di Audit. Lindomar Scoop a traha 8 aña na Aruba y a regresa Corsou ora cu el a asumi e funcion di Presidente di KPMG.

Pa loke ta e oficina di KPMG na Aruba, desde salida di Indira Solognier, a apunta Wim Grootveld como e lider pa e oficina. E ultimo aki ta un Accountant cu 11 aña di experencia y bibando na Aruba desde 2014 caba y gusta e cultura di nos isla.

Cu e cambio den liderazgo na nivel di Caribe Hulandes, ta intencion di Lindomar Scoop pa ta hopi mas envolvi awor cu clientenan pa e servicio di Audit, tanto na Corsou pero specialmente na Aruba unda e lo cuminsa bishita regularmente atrobe. Intencion ta pa brinda mas sosten na e oficina na Aruba, cu ta conta cu 14 profesional activo cu ta traha diariamente cu masha pasion y dinamismo den e servicio di Audit y Advisory.

KPMG Caribe Hulandes & Surinam ta parti di e red mundial di KPMG International y tin mas di 150 profesional masha pasiona trahando riba tereno di servicionan di Audit y Advisory. KPMG DC&S ta enfoca riba e 5 sectornan mas importante den nos economia, esta e sector financiero, sector publico, sector di salubridad, energia y industria di telecomunicacion. Den e region Caribe Hulandes y Surnam, KPMG tin ademas di su oficina na Aruba, oficinanan na Surnam, Boneiro, Sint Maarten, Cuba y Corsou.