Locual cu Aruba ta pasa aden pa nos di partido Curpa no ta un sorpresa. Al contrario nos a adverti pueblo kico lo spera nos. Esaki ta un di e gobierno mas malo di historia despues cu Aruba a drenta su Status Aparte. Ora un pueblo vota pa partidonan cu ta contra leynan di Dios y ta apoya leynan di hende ta bin miseria.
Bo no por bisa Dios bendicionabo y despues bo ta vota pa leynan cu tin abominacion den bista. Pueblo esaki ta e momento pa escohe entre bendicion y maldicion. Partido Curpa tabata e unico partido politico cu a para pa leynan di Dios.
Un partido cu a campaña cu nan lo goberna sin medida y yen di promesanan falso, awe a resulta cu nan no tin e pueblo na pecho sino nan propio beneficionan. Awe e partidonan aki tin cu sinta riba nan blaar y sin solucion. Nos por mira actonan di corrupcion, manera na DVG, e dokter microbiologo na hospital cu a tuma su retiro y a baha na awa. Nos por corda esun di paptest tambe a baha awa cu tambe tabata traha na nos hospital. Te awe nos no a tende nada mas.
Tabata tin placa pa regala Citgo 175 miyon dollar, 131 miyon di fase riba caya y tambe tin mas cu 100 mil florin pa organisa parada di luz, pero no tin placa pa nos grandinan, pa enseñansa, pa drecha nos planta di purificacion, pa Serlimar, ni pa empleadonan publico nan 12.6%. Tin placa si pa regala directornan cu un golden handshake. A aumenta prijs riba recohemento di sushi, ta bay cobra riba remedi y ora di bay dokter, prijs di awa y corriente ta bay subi, schoolgeld ta bay di awg.175,= pa awg.585,= y di awg.250,= pa awg.635,=, aumento di prijs di gasoline, aumento riba prijs di alimento y e cherry riba e bolo ta introduccion di un BTW di 18% entrante di januari 2023.
Pueblo di Aruba ta tempo pa nos busca cara di Dios paso locual cu ta e gobierno aki no tin ningun solucion. For 1986 bin ariba a vota pa partidonan tradicional, pa hendenan “studia” y awe nos debe nacional ta 128% di nos GDP. Nos no ta nan pero nos ta pio cu nan.
Solamente cu sabiduria di Dios nos por saca Aruba for di e abismo cu nan a hinca nos pueblo aden. Pronto lo bay tin eleccion aki na Aruba paso e bom aki su mecha ta cortico y lo bay bula sigur. No vota pa hendenan cu no ta kere den Dios y cu ta baña cu tur sorto di awa pa asina yega na poder. Si bo ta un Cristian y bo tin temor di Dios nunca di bo bida por vota pa hendenan cu ta bay contra leynan di Dios y asina entrega bo isla den man di scuridad. Esaki ta e tempo pa lanta y briya. Ban construi un fundeshi nobo y solido y pone confiansa den Dios. Nos ta di partido Curpa ta extende nos man pa asina hunto nos lucha pa nos Aruba Dushi Terra. Ban hasi nos Aruba Dushi Terra back.
