Lider partido Curpa, Eric Ras: Un cambio ta necesario pa salba Aruba di mas perdicion financiero y moral

The clock is ticking y no na fabor di gobierno. Nos di partido Curpa ta kere cu juni ta uno crucial pa e existencia di gobierno aki. Gobierno a coba un pos y awor e mes lo wordo dera den dje. E problemanan lo pasa manera un tsunami cu lo bay riba gobierno y esaki ta e cosecha cu nan lo recoge.

Gobierno ainda ta bira rond pa pone su firma bao di e RAFT y asina pone Aruba bao di curatela. Gobierno no tin 916 miyon pa paga gobierno Hulandes. Interesante pa sa si nos prome minister lo firma bij het kruisje manera el a haci dia 13 di November 2020 y asina entrega nos autonomia completo.

Aruba a conoce e gobierno di mas malo den e ultimo 6 aña. Nan ta un fracaso total. Nos por a mira cu tabata tin un conferencia riba tereno di agricultura pero peticion pa tereno ta pega na DIP. Hendenan ta wardando tereno como 2 aña caba pa haya un huurgrond pa sembra of cuido di bestia. A yega ora pa stop di pronkia y pone man na obra.

Riba tur tereno gobierno a score malisimo. Pueblo di San Nicolas ta mira cu gobierno no ta saca un man pa yuda John Wesley College. Aña escolar ta yegando su fin y ta tristo pa mira cu un scol cu a aporta asina hopi na e pueblo di San Nicolas dal su porta cera si nada no wordo haci. Nos por mira cu ta den tempo di eleccion so e pueblo di San Nicolas ta importante pa nan voto y awor cu nan mester di un man gobierno ta laga nan na caya. Pronto lo tin eleccion y pueblo di San Nicolas mester pone tanto partido MEP como partido RAIZ na careda.

Minister di nos grandinan ta ainda sinta man cruz y no kier sinta na mesa pa caba cu e incertidumbre di SABA. Laga nos mira si di parti di e minister tin boluntad. Segun nos por a compronde cu SABA tin su cuenta anual pero si no sinta na mesa no por yega na solucion. E minister mester a bay Parlamento caba pa pidi pa aloca e fondo cu SABA mester. Ora pa scapa un ex minister di turismo di partido mep si gobierno a core bay Parlamento pa scapa pellejo pa un suma di 2.1 miyon florin y tabata tin mester partido Raiz pa ta e salbador. Segun nos por a compronde cu SABA no a haya ningun ayudo y lo no hay’e tampoco. Gobierno ta pone minister Arends su cara na berguensa.

Tin asuntonan hopi importante pa trata pa bienestar di nos isla y nos tin un gobierno sin vision. Nos di partido Curpa lo desea di mira e asunto di nos grandinan keda resolve pa asina por reina un paz pa tur esnan envolvi. E asunto di BBO na frontera cu 7% tambe ta un otro medida. Hulanda su costo di bida a aumenta cu 15% e aña y ta un pais cu ta produci, Si na Hulanda ta papia di 15% anto aki na Aruba nos por asumi cu e lo ta 30% pasobra tur cos importa. Nos por a mira cu 3 parlamentario di partido mep a bay reunion di IPKO y pa spaar placa a dicidi di keda hunto den un camber pero ora cu lo bay trata e ley di BBO na frontera nan ta cla pa grita pro pasobra mester di placa pa sigui biaha.

E reintroduccion di parkeermeter a resulta den un fracaso. Nos di partido Curpa no ta mira e departamento aki lo bay genera e placa cu nan a kere di ricibi. E tristo ta cu el a haci e situacion den nos centro di ciudad mas pio di locual cu e tabata. Esaki ta refleha tambe cu situacion financiero di nos pueblo ta hopi malo. No por a tende cu 60% di nos clase trahador ta biba di un minimumloon. Gobierno mester habri su wowo y mira cu no tin espacio pa mas medida.

Un otro ley ta esun di matrimonio di mesun sexo. Nos por a mira cu grandes liga a cancela e celebracion di orguyo pasobra el a mira caba cu e orguyo ey lo hiba grandes liga den un perdida biyonario. Budlight y Target a hiba un perdida di mas di 25 biyon di dollar den un corto tempo. E pueblo Americano ta boycott tur cos cu ta haci cu e celebracion aki. Si Aruba kier conserva e mercado di turista Americano mester pensa bon prome cu tuma un paso cu lo ta desastroso pa nos turismo. Nos ta kere cu locual a pasa 9 di februari 2023 cu e crucero, a laga un sabor amargo atras. Nos ta den e tormenta perfecto y prome cu luna aki termina nos lo haya sa con nos isla lo ta para financieramente y locual cu pasa na Europa y America lo tin consecuencia pa nos tambe. Pueblo di Aruba laga nos mirada ta riba Dios pasobra ta Dios so tin solucion pa nos situacion. Esaki ta e señal pa nos pueblo uni cu partido Curpa. Tur otro partidonan a usa nos pueblo Cristian solamente pa e voto y nada otro. Partido Curpa ta keda e unico alternativa.