Bo tin integridad of bo no tin’e. Papia bunita y no ta interesa den cumpli ta demostra cu bo no ta di confia y bo no tin integridad y lamentablemente lo tin consecuencianan desastroso pa nos pueblo. Nos por a mira cu gobierno a warda te na e ultimo momento pa firma pa e refinanciamento di e placa cu a fia den tempo di COVID.

Tabata falta 5 minuut pa 12’or ora di Hulanda cu nos minister di finanzas a core firma un acuerdo di pago cu Hulanda. Ta obvio cu Hulanda kier a straf gobierno, pero directamente a straf nos pueblo tambe cu no tin ni arte ni parte den e mal maneho di e gobierno. Hulanda no ta confia gobierno y a fada di e falta di cumplimento di palabracion di gobierno y a pone presion pa firma bij het kruisje na un interes mas halto cu a impone riba e otro islanan di 6.9%. E minister contra tur regla di bon gobernacion a mara pais Aruba pa 20 aña largo paga e debe di COVID cu lo costa pais Aruba 109 miyon florin den 2024. E minister a bay contra e ley di comptabilidad paso e minister ta autorisa solamente pa firma pa 5 aña y awor ta mara pais Aruba pa 20 aña largo.

Kico tin tras di e 20 aña aki? Solamente Hulanda lo saca beneficio di interes cu Aruba mester paga? Casi 800 miyon florin pais Aruba lo mester paga en total. Esey kiermen den un aña pais Aruba lo mester paga 63 miyon na interes na Hulanda. Tur e proyectonan PPP ta sali 97 miyon bruto den un aña. Nos tur sa cu no por confia e gobierno aki. Riba e diabierna scur di 13 di november 2020 a firma COHO y te cu awe e landspakket ta na vigor y despues a firma Onderlinge Regeling. Nada no a cambia den ultimo 6 aña di gobernacion. Un gobierno ta core firma pero ta keda bira rond.

Gobierno ta sigui zink Aruba den debe. Den e presupuesto 2024 ta hinca e interes di COVID na 3.1% pero e realidad awe cu pais Aruba mester paga 6.9% na interes. Nos ta kere berdad cu Hulanda lo a pone presion riba pais Aruba cu si bo no firma prome cu 12’or di anochi ora di Hulanda gobierno Hulandes a laga pone beslag riba e companianan estatal di pais Aruba. Na Aruba tabata 5:55 pm. Despues di a mara pais Aruba na man cu pia pa 20 aña nos di partido Curpa no ta mira cu Hulanda lo sigui negocia cu Aruba riba e debe di COVID. Aruba a habri man tuma 916 miyon florin for di Hulanda na aña 2020 den temporada di e corona virus pero ora di paga back gobierno tabata manera un cangreu pa ora di paga Hulanda e placa cu a fia. Nos por corda con gobierno a mal usa placa di e prestamo di COVID den “FASE”. Asina nos gobierno a pone cara di Aruba na berguensa den Reino Hulandes.

E gobierno aki tin un fecha di lo caduca pero sigur lo no ta na juni 2025. Custumber di gobierno ta pa malgasta placa di pueblo prome y despues ta core pidi Parlamento pa exonera mal maneho di gobierno. Nos tin un Parlamento cu ta complice di mal administracion di placa di pueblo. E gobierno di partido mep aki a crea e GIGA DEBE y caba di zink pais Aruba. Nos tin un gobierno cu ta cana den scuridad. Pakico? Paso nos gobierno ta contra leynan di Dios. E gobierno cu ta goberna cu husticia ta duna su pais stabilidad pero e gobierno cu ta goberna cu medida ta destrui su pais. Unda e luz y husticia di Dios ta eynan tin prosperidad. Nada mal ranca lo bo disfruta di dje. Nos lo tin cu tene duro paso no ta bay ta facil pero laga nos keda confia riba Dios. Despues di e tormenta solo lo briya. Dios su tempo ta perfecto y Aruba lo wordo salba di tur e inhusticia cu e gobierno aki ta haci contra di nos grandinan y di esnan cu no por defende nan mes. Partido Curpa lo keda como e unico alternativa pa trece e cambio tan anhela di nos pueblo.