Lider fraccion PPA Otmar Oduber: Preocupa pa silencio rond di formacion di gobierno y con esaki por afecta negociacion cu Hulanda pa cu Rijkswet

Ayera mainta durante un conferencia di prensa parlamentario y lider di fraccion PPA den Parlamento, Otmar Oduber, a trece dilanti un biaha mas e topico di Rijkswet y a subraya su preocupacion pa e silencio cu tin relaciona cu formacion di gobierno y con e tempo cu ta tardando por tin efecto den henter e situacion di Rijkswet.

Oduber a indica cu mescos cu hopi den comunidad partido PPA ta poco ansioso pa e formacion aki por tuma luga, sinembargo, el a señala, si mira formacion di diferente gobierno toch a tuma un periodo un poco mas largo pa por a forma gobierno.

El a resalta cu loke ta hopi obvio den e formacion aki ta cu ta reina un silencio total, y esaki, segun el a splica, ta pasobra ta trata di dos partido cu tin hopi punto cu no ta den comun, hopi punto cu e partidonan mester atende cu nan. Un di e puntonan ta e Rijkswet cual mester ser atendi cune y firma prome cu dia 1 di mei di e aña aki.

Oduber a splica cu esey ta nifica cu tin practicamente tres luna pa “e dia fatal yega”, cual ta 1 di mei. Relaciona cu esaki fraccion PPA a haci peticion na Parlamento di Aruba pa tene un reunion publico tocante e topico aki, pero no a haya sosten te na e momentonan aki di otro fraccionnan. Manera ta conoci mester di tres firma, tres parlamentario, pa un peticion pa reunion publico por ser entrega.

E parlamentario a sigui splica cu a pesar cu el a acerca cada un di e fraccionnan no a logra haya sosten y un di e fraccionnan cu ta formando gobierno a indica cu nan prioridad aworaki ta pa forma gobierno y no ta mira como prioridad pa yama un reunion pa trata un tema importante manera Rijkswet.

Di otro banda, el indica, fraccion MEP a solicita un OB (Openbaar Bijeenkomst) pa gobierno duna un actualisacion update pa loke ta tumando luga cu e Rijkswet.

“Di parti partido PPA loke ta importante ta cu ta haya informacion, pasobra ta parce cu tur cos ta keto aworaki y mientras tanto Hulanda no ta worry cu tabatin eleccion dia 6 di december, no ta worry cu tin formacion di gobierno pa mas cu un luna aworaki,” el a menciona.

El a agrega cu e proceso di formacion di gobierno andando, a perde dos pa tres luna caba cu por a pone un posicion como Aruba, como e Constelacion nobo di parlamento cu ta full diferente na e ultimo Constelacion.

Oduber a remarca cu aworaki tres partido cu tabata na fabor di e Rijkswet no t’ey mas y aworaki tres di e cuater fraccion den parlamento a vocifera den e eleccion recien cu nan ta contra e Rijkswet manera cu e ta na e momentonan aki. Fraccion Futuro ta e unico cu ta sostene e Rijkswet manera cu e ta na e momentonan aki.

Parlamentario Oduber cu su preocupacion pa loke ta e proceso di formacion ta cu e ta tardando, tin un silencio y no tin informacion tocante kico ta pasando. “Tin cu duna espacio, ta okay pa duna espacio, pero ta okey tambe pa bo informa bo pueblo di con e desaroyo di formacion ta pa bo trece trankilidad,” el a subraya.

Oduber a enfatisa cu Aruba ta na un crusada sumamente importante pa futuro di e pais y for di su punto di bista hopi hende ainda no ta realisa. El a indica cu pa motibo di e urgencia y importancia di e tema y teniendo na cuenta tur e tempo cu ta tumando cu formacion di gobierno, fraccion PPA a bin cu e proposicion pa crea un frente nacional caminda Parlamento di Aruba ta tuma decisionnan na tempo.

E parlamentario a menciona un carta u Raad van State manda pa entre otro Tweede Kamera den cual nan ta indica cu e Rijkswet, manera cu e ta aworaki, ta bay liña recta contra e posibilidad pa Aruba por desaroya un economia y amplifica for di turismo pasobra e no ta duna un espacio pa inverti pa motibo cu e normanan cu ta ser poni ta asina fuerte cu e ta limita diversificacion di economia.

“Esey ta nos preocupacion, cu niun hende ta papiando di dje, nos ta den honeymoon, nos ta creando un matrimonio, pero lubidando cu e tempo fatal ta cerca. E hecho ta cu tin tres luna pa tuma un decision y Hulanda no ta bay desvia di esaki pasobra cu tin un gobierno nobo,” el a remarca.

Oduber a indica cu negocia e Rijkswet den poco tempo cu tin ta casi imposibel y p’esey el a trece dilanti e proposicion pa implementa e frente nacional cu no solamente e cuater partidonan cu ta den parlamento ta participa den dje, pero tambe sector priva, gremionan comercial y sindical pa fiha un posicion como Aruba y mustra Hulanda cu e Rijkswet no ta bon.

Y di dos e hecho cu el a señala ta cu bo mas cu 200 miyon florin adicional a drenta den caha di gobierno durante ultimo aña aki, pero no a mira ningun alivio pa comunidad.

“Abo pueblo puntra bo mes; bo a mira un reduccion di prijs? Bo a mira un florin di costo di bida baha? Abo como comerciante a mira cu como comercio e cost of doing business a baha cu un florin den bo operacion?,” el a cuestiona.

El a splica cu e polarisacion cu tin rond di e Rijkswet ta loke ta pone hende perde enfoke di e realidad di e peso di loke ta nifica e posicion huridico di Aruba dentro di Reino y como pais autonomo.

Pa loke ta e Rijkswet mes, Oduber a splica cu den e uitwerking di e Rijkswet den e Landspakket por mira caba cu e intencion ta pa elimina e florin Arubiano y dolarisa e mercado di Aruba, kier a mete den e manera di maneha pensioen y kier a aumenta e edad di pensioen, kier a mete y pone mas medida pa pueblo di Aruba manera ta e hecho cu eigen bijdrage. “Bo ta mira e direccion unda Hulanda kier bay,” el a destaca.

Den caso cu Hulanda y Aruba no yega na un acuerdo, el a indica cu como fraccion PPA e ta di opinion cu tin espacio ainda y tin alternativa pa negociacion cu ainda no a ser explora y si despues di esey Hulanda no acepta eseynan tampoco, e ora como pais Aruba mester step up, “pasobra tin espacio pa step up.”