Lider di fraccion di AVP den Parlamento, Mike Eman, durante di reunion publico ayera mainta, a enfatisa riba e situacion cu pensionadonan y trahadonan cu salario minimo, ta pasando aden cu aumento drastico di costo di bida, pa cual gobierno actual no tin atencion.

“Lamentablemente awe, e concepto y consenshi , cu esunnan mas vulnerabel den e pais, esunnan cu ta biba riba bijstand, pensionadonan, esunnan riba un salario minimo, tur y mas di 50 mil ciudadano, ta sufriendo na e momentonan aki den un pobresa penoso.

Un pobresa cu a inicia na 2017 y cifranan di Centraal Bureau Statistiek, ta marca claramente cu esey tabata e momento cu cosnan a cuminsa cambia den e pais aki, pa esunnan mas vulnerabel.
Esaki ta un sociedad cu los di cualkier partido politico, los di cualkier gobernacion cu decadanan atras a realisa cu mester tin leynan laboral pa proteha empleadonan, pa nan no traha mas cu 8 ora y pa nan tin un dia liber.

Awe lamentablemente nos empleadonan tin cu traha dos trabou pa placa por yega pa nan pone pan riba mesa pa nan famia. Esaki ta e pais cu a crea leynan pa proteha esunnan cu no tin placa, pa bay dokter, pa paga pa remedi y a introduci un AZV pa tur hende riba e pais aki pa nan tin siguransa cu nan tin cuido medico.

Awe e concepto aki di cuida esunnan mas vulnerabel den e pais, pa paga pa nan salud, esaki ta wordo destrosa paso a paso y awe tin hendenan grandi ta yega na botica cu cinco remedi cu pa añanan nan tin prescribi, nan ta haya tende cu tres ta wordo paga pa AZV y cu dos no mas.

Un pensionado kende apenas tin suficiente placa pa por paga pa tur nan otro necesidadnan, ta haya nan awe ta laga dos remedi atras haciendo un daño enormemente grandi na nan salud.

Esaki ta e pais cu a crea enseñansa publico, pa tur mucha por bay scol, esaki ta e pais cu a crea subsidio pa scolnan, bijzonderescholen, SKOA ta haya subsidio pa asina nos muchanan por bay scol.

Awe ta resulta cu si mayornan no tin 200, 300, 400, 500 florin pa paga schoolgeld, portanan di scol ta wordo cera pa e mucha- y hobennan aki. E decadencia aki a inicia na 2017, caminda na 2017 gobierno a cambia prioridad di e pais aki, di sirbi e bon comun, pa bay sirbi interesnan particular, interesnan otro, aheno na e interes general di e pais y di pueblo aki.

Cuanto mayor na e momentonan aki, tin dificultad enormemente grandi pa por cera e placa pa por yega na e suma cu mester pa paga schoolgeld pa asina e muchanan por bay scol, cu ta un situacion di lamenta profusamente,” lider di fraccion di AVP, Mike mustra ayera mainta den Parlamento.