(AP)—Prome minister Polaco Donald Tusk a bisa ayera cu su forsanan lo sigui fortifica e frontera cu Belarus y por usa “tur opcion disponible” pa defende e frontera di e nacion NATO, despues cu un soldaat a ser hinca gravemente pa un migrante.
Tusk a bisa cu e “buffer zone” aproximadamente 200 meter hancho lo ser poni na e frontera, cual tambe ta e frontera pa Union Europeo, ademas di un barera metalico di 190 kilometer ya caba den luga pa preveni e entrada di migrante crusando for di Belarus. Polonia ta bisa cu e presion di migrante ilegal ta organisa pa Belarus y Rusia.
Tusk a bisa cu e gobierno lo tuma decision riba e buffer zona otro siman. Tusk hunto cu e ministernan di Defensa y Asunto Interior, a bishita tropanan, guardianan di frontera y forsanan di polis sigurando e frontera despues di e atake cu cuchiu riba un soldaat diamars cerca di e pueblo Dubicze Cerkiewne.
Oficialnan a bisa cu un migrante a yega na otro banda di e baranan di muraya metalico mas cu 5 meter halto separando Polonia y Belarus y a hinca e soldaat den ribchi. Forsanan di seguridad Polaco no por a detene e atacador pasobra e tabata na e banda di Belarus, segun oficialnan.
“No tin espacio pa negociacion. E frontera di Polonia mester ser proteha,” Tusk a bisa. “Tropanan Polaco, guardianan di frontera, agentenan a bira e obhetivonan di agresion y bo tin tur derecho, no pa bisa un obligacion, pa usa cualkier opcion disponible pa bo…ora bo ta defendiendo no solamente e frontera pero tambe bo bida,” Tusk a bisa.
Tusk y minister di Defensa Władysław Kosiniak-Kamysz a bisa cu mas forsa policial y militar lo ser desplega pa e area. E gobierno pro-Europeo ta bisa cu presion y agresion di migracion ilegal ta aumentando, pusha pa Rusia y Belarus pa destabilisa Europa mientras Moscu ta busca guera riba Ucrania. Autoridadnan di Polonia ta bisa cu gruponan migrante ta inclui mayormente hobennan masculino, compara cu famianan cu hende muhe y mucha den pasado. Te awo mas cu 13,000 intento pa crusa ilegalmente a ser registra e aña aki, cual ta un aumento pa e mesun periodo aña pasa.
