Bon Dia Aruba a tuma contacto cu lider di partido Red Democratico Ricardo Croes despues di a tuma nota di un noticia fastioso riba rednan social cu un hende a menasa su persona cu morto. E ta confirma nos cu ayera tardi ora e tabata train den subi y baha Hooiberg pa su condicion fisico, un persona hende homber cu ta papia papiamento y hulandes a menasa sr. Croes cu e lo tir’e cu dos bala den su cabez mata. Croes: “Mi ta un homber di 50 aña y nunca di mi bida un persona a yega di menasa mi asina. E cos aki ta dunami duele. ”
Sr. Croes ta relata cu el a djis bisa e persona bon tardi manera cu e ta saluda tur hende ora di bay Hooiberg. E persona a dirigi su mes cerca sr. Croes den un manera hopi negativo cu un comportacion hopi straño, segun sr. Croes ta describi e situacion. “Mi tabata purbando di wak dicon e tabata asina agresivo cumi despues di a bis’e un bon tardi, e por a djis ignorami y sigui cana su caminda.” Sr. Croes ta bisa cu e no tin ningun idea si esaki tin di haber cu politica of no.
Sr. Croes mesora a bay duna un denuncia y entrega keho pa menasa di morto na Centro di Husticia na Santa Cruz, caminda un proces verbaal a wordo traha door di polis cu lo sigui cu e pasonan correspondiente.
