“Awe ta dia cu democracia ta biba den nos comunidad”, Ursell Arends, lider di Partido Raiz, a comenta na urna di votacion ayera. “Awe ta e dia cu pueblo tin e poder pa scoge e partidonan, e gobierno cu pueblo ta desea. Y pa nos, nos ta hopi contento awe di por forma parti di esaki tambe.”
“Na 2017, pa un margen asina chikito nos no a logra saca un asiento. Pero e eleccion aki mi ta convenci di e ekipo, e team profesional cu nos tin, y e confiansa, e sosten cu nos tin den comunidad.”
Contestando kico por a falta eleccion anterior cu nan no a logra yega na un asiento, Ursell a bisa cu na 2017 ‘hende a wak Raiz como un experimento’. “Pero aworaki nos ta un partido estableci cu nos raiznan fuerte hancra den nos comunidad. Y nos ta bini ta structura nos mes, organisa nos mes, caminda cu nos por a gana e confiansa di comunidad tambe. Di e 2107 voto, cu a deposita nan confiansa y nan sosten den nos den eleccion anterior, nan mes tabata e cultivadornan cu a yuda nos sigui plama e simianan, cultiva speransa den nos comunidad.”
Riba disposicion di su partido pa bay den coalicion, Arends a comenta: “Nos ta cla pa asumi e responsabilidad cu pueblo duna nos. Y mi ta kere un coalicion ta algo cu lo funciona tremendamente pa mantene tur hende honesto. Y esey ta loke Raiz ta para p’e tambe.”
Bon Dia Aruba a puntra Arends si e ta kere cu acuerdo cu Hulanda ta crucial pa negociacionnan cu otro partido, pa loke el a contesta: “Mi ta kere cu nos tin e landspakket, y esey ta algo cu lo mester bay wordo introduci den tempo corto y lo tin efecto a largo plaso tambe. Nos ta habri pa traha cu esakinan. E ta algo cu nos mester bay implementa pa asina por cambia e structura di nos aparato publico y tambe con nos ta funciona como isla.”
