Na Centro di Bario Noord, Bon Dia Aruba a acerca lider di partido PPA, Lisette Malmberg pa ricibi su impresion na momento cu el a eherce su derecho di voto.
Contestando si e ta sinti cu pandemia di Covid-19 a haci un cambio den mentalidad di e ciudadanonan, Malmberg a bisa cu ‘tin biaha un crisis ta bira un oportunidad’. El a indica cu e pandemia a yuda trece den claridad e retonan y e problemanan structural cu mester atende.
“Nos prioridadnan, e prome sigur ta pa nos pone ordo den e cas cu yama Aruba, e ordo den cas cu yama gobierno”, el a indica, agregando cu nan kier haci “cambio den e structura, cambio den sistema, reforma real.”
Prensa a puntra kico Malmberg ta pensa a resona mas entre su sostenedonan, pa loke el a contesta: “Mi ta kere e hecho cu nos no ta haciendo promesanan bashi. Nos ta biniendo cu un plan real, un plan structural, nos ta biniendo cu reforma.”
A puntra Malmberg tambe, mirando cu den pasado el a bisa cu e no lo forma coalicion cu partidonan tradicional (grandi), si esaki ta e caso ainda? El a bisa cu nan ‘lo traha cu tur hende’. “Mi speransa ta cu nos lo pone semper e futuro di Aruba, e cos cu ta miho pa Aruba, den prome luga. Sinembargo, pa nos forma gobierno hunto nos tin cu haya otro, (…) tin cu comparti vision, valornan, y direccion.” El a bisa cu maske no ta bisa cu no ta posibel, te awo nan no a mira ‘e cambionan structural den e partidonan grandi cu nos ta spera di mira’.
