ORANJESTAD – Siman pasa na Sint Maarten a tuma luga reunionnan entre Aruba, Corsou, Sint Maarten y Hulanda riba varios aspecto. Un di e temanan cu a trata ta COHO, e ley di Reino unda cu Hulanda lo apunta tres persona cu tincu tuma decision riba e futuro di cada pais. Desde cu e idea aki a bin riba mesa, Aruba a lucha contra di dje.
Sinembargo, na cierto momento cu lomba contra muraya y pa necesidad di placa a acepta cierto condicionnan pero a sigui bringa. Den e espirito aki Aruba a bin cu un alternativa pa baha e COHO for di riba mesa y bin cu algo diferente, y a logra.
Durante di momentonan crucial den negociacion na Sint Maarten, mi a corda riba e empeño y pasion cu Betico Croes tabatin pa Aruba y su expresion ‘Si mi cay na caminda, gara e bandera y sigui cu e lucha’. Di e tempo ey caba prome cu Aruba a haya Status Aparte, Betico Croes por a premira cu unabes haye, e lo bay wordo poni bou di presion y atake. Esaki Aruba a pasa aden, pero mi a gara e bandera y cu hopi amor pa Aruba, a lucha y aworaki a logra mantene e autonomia, Lider di Partido Wever – Croes a expresa.
E logro mas importante ta cu e autonomia di nos pais ta keda den nos man, futuro di nos pais ta nos ta determine y nos Parlamento ta keda cu e poder cu e tabatin. Exactamente e fundeshi cu Betico Croes a crea pa nos pais.
Por ultimo Lider di Partido Wever-Croes a bisa: Na caminda pa dia di Betico, ban recorda e lucha di Betico Croes. Ami ta corda riba dje tur dia den trabou y cu tur decision. Mi ta wordo inspira pa e forma con el a guia e lucha pa Aruba. Betico Croes tabata sa con pa uni e pueblo, Aruba a logra e cosnan di mas grandi den union, pues ohala cu e espirito di amor y union aki por inspira nos pa logra cosnna grandi pa Aruba.
