Lider di Partido Mep, Evelyn Wever-Croes: A pesar di e retiro di Daphne Lejuez… Gabinete Wever-Croes ta sigui traha pa trece e stabilidad politico cu Aruba mester

“Awe mi a ricibi un sorpresa pa e carta di retiro di Daphne Lejuez, cu a wordo treci pa mi via un deurwaarder. Sorpresa pasobra mi tabata tin contacto cu sra. Lejuez ultimo dianan cu tabata mustra normal. Sorpresa pasobra el a pidi mi pa ami atende su preocupacionnan pa cu e ley di Serlimar, pero mi no a tende mas di dje. Sorpresa tambe pasobra e semper a bisa cu e lo no bay cu asiento di partido.
Sinembargo esaki ta algo cu Partido MEP lo atende cu ne”, asina lider di MEP Evelyn Wever-Croes a cuminsa e conferencia di prensa di Partido MEP diaranson atardi.

Wever-Croes a sigui bisa cu e paso cu Daphne a tuma sigur no tabata un paso facil, y ta desea Daphne tur cos bon.

“Como Prome Minister di nos pais mi tin cu bisa cu e desaroyo aki nada no ta cambia pa Gobierno, Coalicion MEP, POR, RED ta sigui goberna a base di e acuerdo di gobernacion “Hunto Pa Aruba” y nos lo sigui atende e retonan real di nos pais y brinda nos pais e stabilidad cu Aruba mester. Pasobra na fin di dia, ta esey ta importante. Ta stabilidad lo trece progreso y bienestar pa tur ciudadano, specialmente na esunnan di menos recurso.

Mi ta lamenta e decision aki di un miembro di nos coalicion pasobra mi ta di opinion cu riba tur cos nos mester di stabilidad. Nos tur hunto – Daphne tambe – a scoge pa un coalicion dos aña pasa pa trece stabilidad den nos pais. Nos cada un a pone nos interesnan personal y di nos partido un banda pa pone e interes di Aruba y stabilidad di Aruba na prome luga.

Mi a compronde cu e decision ta basa riba malcontento con cos a bay, cosnan cu por a irita otro. Pero tur ta parce mi cosnan cu por a wordo atendi na mesa internamente. Pasobra mas aleu cu un ley of un iritacion entre coleganan, tin e interes di Aruba y esey ta stabilidad. Mi a compronde cu el a indica cu e lo sigui sostene e bon maneho di nos gobierno y mi ta conta riba esey.

Ban hunto demostra awor cu ta interes general di Aruba ta na prome luga. Ora bo curason ta cerca di pueblo, bo ta haya solucion pa cualkier problema of situacion. Nos semper a pone interes general di Aruba na prome luga y nos lo sigui haci esey”, segun Wever-Croes.