Señora Marisol Lopez-Tromp, lider di partido MAS, tabata presente na scol basico Washington caminda e la eherce su derecho di voto y tambe ta en espera di un resultado positivo pa su partido.
BDA: “Si partido MAS tin e oportunidad pa goberna, lo forma un coalicion cu partido MEP of partido POR?
“Awe ta e dia cu pueblo ta bay papia, y mi tin fe cu pueblo en todo caso ta consciente di e mensahe cu nos a bin ta trece, no solamente pa vota pa e politico cu bo ta kere aden y confia, pero pa bo vota pa e cambio”, señora Lopez-Tromp a bisa. “No mas loke tabatin te cu aworaki, no mas loke gobierno ta bin ta haci cu nos y muy en particular nos di MAS ta para duro pa un bon gobernacion, transparente y contra abuso di fondo di pueblo, contra friends and family y muy en particular gobernacion anti corupcion”.
BDA: Comparando señora Lopez-Tromp su experencia como minister di infrastructura di 2001 pa 2009 y aworaki na 2020, kico lo haci diferente si tin e oportunidad pa goberna?
“Loke a keda constante ta traha pa e causa di Aruba no obstante cua partido politico mi por a traha aden, semper ma keda fiel na e ideologia y e causa pa traha pa henter Aruba, pero muy en particular esunnan mas vulnerable den nos comunidad”, señora Lopez-Tromp a bisa. “Nos a traha un programa realistico, teniendo na cuenta, muy en particular, e acuerdo cu a wordo firma aña pasa door di prome minister, nos tin un programa cu ta tene na cuenta pa hiba Aruba dilanti, den un forma realistico. Nos no ta bin cu storianan bunita, nos ta bin pa traha, y cu e team dinamico cu MAS tin y cu mi experencia di casi 24 aña, nos ta cla pa sirbi Aruba”.
