Despues cu diadomingo ultimo, partido Hubentud Treciendo Cambio (HTC) a sali caya pa cuminsa plak sticker di partido riba auto cu tabata pasa na rotonde di Tanki Leendert for di 10 di mainta, den oranan di atardi a informa cu un menasa a cay contra su persona.

Webb a publica riba su rednan social lo siguiente: “Mi kier ta cla den esaki, mi no ta bay acepta menasa na mi direccion of na HTC su candidatonan. E persona cu a manda menasa na mi direccion, mañan mi lo cana mi caminda legal. Mi a avisa KPA den reunion di comision di eleccion, cu e biaha aki 2024, no lo ripiti manera 2021 cu mi ta ricibi menasa, anochi hende ta tira piedra riba mi dak, of dal mi auto etc. Nos ta den un pais democratico, unda cu derecho di cada ciudadano ta conta, a mi kier wak pueblo progresa, si X persona no gusta e djis ignora, pero mi lucha ta sigui!”

Por a recorda cu den pasado, den eleccion di aña 2021, HTC tabata haci campaña den bario di Noord specificamente na caya Semeleerstraat, den esaki, lider di e partido Gilbert Webb hunto cu otro dos candidato a haya un agresion di parti di tres persona hoben cu tabata den auto, el a cualifica e acto aki como intento di asesinato ora e auto a bay direccion riba nan masha duro mes y Webb a haci un denuncia.

A bira conoci cu pa dia 6 di december 69.823 votado registra lo haci uso di nan derecho pa vota caminda HTC como partido ta señala cu nan kier haya por lo menos 3.000 voto e biaha aki.

Pa e motibo aki, Webb a informa cu e ta cla pa eleccion 2024 y cu firmamento ta bay tuma luga proximamente pa partidonan cu no ta den parlamento y HTC ta un di nan, “HTC ta pidi di curason na e pueblo di Aruba pa para firma pa e cambio di berdad,” el a bisa.

Ademas, el a trece dilanti cu gobierno actual “a scoge un opcion y e opcion ta na nan bienestar y no di e pueblo su bienestar. Nan a scoge pa worry riba poder y esaki ta loke HTC simplemente no ta acepta. Pasobra esnan cu ta sinta den gobierno y esnan cu a haya oportunidad mester a haci bon uso di esaki.” Costo di bida ta aumenta, gasolin ta aumenta, problemanan social ta sigui aumenta manera e ta señala y cu den tres aña aki “kico nan a haci pa bo bienestar?”

Webb ta señala cu HTC ta para firme unda nan kier crea un parke di atraccion no solamente pa personanan cu ta desea di pasa un dia cu nan famia pero tambe pa esey trece un entrada extra pa pais Aruba, “cu lo boost e economia di Aruba. San Nicolas ta bay haya e parke di atraccion aki, San Nicolas ta bay ta esun cu ta bay crece y mira algo back, pasobra cada ciudadano cu ta riba e pida di baranca aki nos tin cu wak en general pero hopi problema ta pasando na Aruba.”

Aparte di e parke di atraccion, el a anuncia cu pais Aruba tambe lo genera varios cupo di trabou pa hendenan local “ na unda cu minimo 1.000 persona, aparte di studio cu nos a haci riba esaki, mas di 1.000 persona lo haya trabou directo y indirecto na e parke dia atraccion aki.”