Lider di partido Curpa Eric Ras: Un voto di confiansa pa partido Curpa ta un voto pa un caminda husto pa nos pueblo

Amor pa nos patria ta existi ainda? Nos por bati riba nos pecho y grita cu Aruba ta nos baranca tan stima? Nos por bisa cu Dios lo guia y conserva nos amor pa libertad? Aruba su economia durante e ultimo 5 añanan tabata tin un crecemento economico? Despues di e ciere di nos refineria nos a busca un otro pilar economico?

Un cantidad di pregunta cu lamentablemente contestanan negativo. Mal maneho y e pandemia a causa nos economia cay den otro y haci nos esclavo di debe y tristo pa constata cu no tin ningun tipo di speransa cu e futuro lo por ta mihor.

Nos di CURPA den mas di un ocasion a expresa nos preocupacion pa e decadencia cu ta tumando lugar na Aruba. Nos a kiboca ora nos a kere cu no por pio, paso e reunion di tratamento di presupuesto a demostra cu ainda nos no a yega e fondo di e abismo. Con por tin confiansa den nos Parlamento cu ta e organo mas halto di nos pais cu mester duna nos pueblo e bon ehempel despues di a experencia un reunion bochornoso. Ta con bo ta bay cuminsa pone ordo na unda bo mes no tin ningun clase di etica ni respet. Si bo kier cambia mundo cuminsa cu bo mes.

Esnan cu mas ta sufri di tur locual ta pasando ta nos pueblo di Aruba. Ora prijs di producto a subi tur caminda na mundo y aki na Aruba ta pio paso casi tur cos ta importa. E costo di bida aki na Aruba a redobla. Hulanda ta papia di inflacion di 12% y aki na Aruba cuanto lo e ta? Un peso grandi riba lomba di pueblo di Aruba lo bay ta introduccion di tur e medidanan hinca den landspakket cu gobierno a firma dia 13 di November 2020 caminda cu a entrega nos Status Aparte. Minister president e tempo ey a bay scondi Hulanda y a firma scondi entregando nos autonomia. E 12-8 ta keda chikito compara cu coho. Parlamento no tin poder mas y awor ta coho ta manda. Esaki ta mesun cos cu Hulanda ta wordo goberna pa hendenan hinca Union Europeo.

Gobierno aki ta papia di mega debe pero ora di mira e berdad e colornan tin geel y berde. Si na aña 2017 nos debe nacional tabata na 70% di nos GBP awe nos ta debe ta na 128% di nos GBP. Si sigui fia e lo surpasa 130% di nos GBP y e presupuesto aki tin un deficit 290 miyon florin. Ta pidi pueblo sacrifica pero gobierno no conoce e palabra sacrificio.

Nos di partido Curpa por a compronde cu schoolgeld lo bay subi cu 300%. Mayornan mester prepara pa un otro golpi. Nos no por spera otro di un gobierno comunista. Nan lema ta mesun cos cu di world economic forum “You own nothing and you will be happy. Esaki nos ta yama sclavitud moderno. Tanto gobierno di signatura geel como esun berde ta cu agenda 2030. Esaki ta tin control riba bo bida. Rond mundo pueblo su wowonan a habri y no ta acepta e dictadura comunista aki.

Partidonan politico ta campaña cu yen di promesanan y cu despues ta resulta un puñal den lomba di pueblo ora yega e momento di goberna. Un cos politiconan mester compronde cu ora bo ta den gobierno bo ta un administrador y no pa haci y deshaci. Bo ta sinta riba un stoel caminda bo a hura pa sirbi interes general na prome lugar.

Pueblo di Aruba ta momento pa cuminsa habri su wowonan. Ta tempo pa trece un cambio pa e direccion cu nos Aruba dushi tera bayendo y esaki ta den man di e pueblo di Aruba. Nos di partido ta kere cu pronto cu e gobierno aki ta bay cas. E luz di toren na Bushiribana a paga. Nos di partido Curpa ta puntra humildemente pa duna partido Curpa bo confiansa pa trece cambio di direccion di nos pais Aruba.