Lider di partido Curpa Eric Ras: Un gobierno indeciso y cu no ta imparcial lo no faborece interes di e famia institui pa Dios

No ta tur cos cu ta briya ta oro. Aruba pa hopi aña a vota pa partidonan cu a priminti un appel di oro pero locual cu pueblo a haya ta un appel putri. Nos por a mira e manifestacion di e pueblo Cristian pa haya oido di gobierno pero e ministernan no a worry ni pa bin pafo pa ricibi e manifiesto di pueblo y esaki ta un bofta den cara di e pueblo Cristian. E contesta di e vice prome minister a papia palabra cla esta cu e grupo minoria tin derecho y nan ta kere den igualdad. Partido Raiz ta un partido chikito cu a bay para banda di e grupo chikito di pro redefinicion di matrimonio y asina trapa riba nos democracia. Mayoria no ta conta mas. Nos por mira claramente cu nos ta biba den un estado di dictadura. Mayoria no tin bos mas.

Aruba su representante den corte di casacion tabata masha debil mes. Corte di casacion su tarea ta pa repasa procedura y locual cu a tuma lugar den e corte no tabata solamente procedura sino a permiti pa emocion tuma lugar. No ta un secreto publico cu den corte tambe tin huesnan cu ta casa cu otro na Hulanda y esaki tambe lo por influencia e sentencia cu lo no tuma lugar e aña aki mas.

For di dia cu Aruba a firma e acuerdo di Sustainable Development Goals no por spera nada otro. Den e 17 punto di Sustainable Development Goals ta inclui e igualdad di genero cu ta encera e matrimonio di mesun sexo. Esaki no ta keda aki paso lo sigui na nos scolnan. Nos por a mira cu e minister di economia a cuminsa bishita scolnan caba. Den pasado nos por a tende prome minister bisa cu ex prome minister di partido AVP a bende su alma pero nos actual prome minister tambe a bende su alma cu Sustainable Development Goals y ta debidamente na altura di e consecuencianan pa nos criaturanan.

Partido Curpa su lucha riba e tereno aki tin hopi tempo ta tumando lugar. E fecha 8 di September 2016 mester keda graba den nos memoria ora cu Parlamento a vota pa geregistreerd partnerschap wordo aproba. Prome di maart 2021 partidonan POR, MEP, RED, y AVP a vota pa e geregistreerd partnerschap drenta na vigor paso tur ta mik riba voto. Nos sa cu e ley ta cla na Parlamento y falta pa e presidente di Parlamento yama e reunion. E partidonan cu vota na fabor ta partidonan mep (6), AVP (4), Raiz (2) Accion21 (1), Independiente (1) y partido MAS (2) Ta jega na un total di 16 voto na fabor.

Nos sa cu Dios ta stima tur hende, pero Dios no ta stima pica. Dios lo duna e pecadornan un chens pero e malbadonan tin cu duna cuenta paso nan no kier arepenti. E palabra di Dios ta bisa cu pago di pica ta morto. Nos isla ta goberna pa hendenan cu no tin temor di Dios. Pueblo nos ta den man di Dios. Partido Curpa lo keda para pa e famia institui pa Dios y nos mester keda defende nos criaturanan. E target ta riba muchanan di 5 pa 8 aña. Nos no por permiti pa e enemigo bin destrui bida di nos criaturanan. Partido Curpa ta e unico alternativa.