Aruba a drenta Status Aparte na 1986 cu un reto grandi e tempo ey. Despues di e ciere di Lago, hopi hende a bandona Aruba y a bay biba na Hulanda y otro paisnan. Lago tabata un pilar economico importante pa nos isla. Hopi no a kere cu nos isla lo lanta para y prospera. Nos por corda e 340 miyon di nos refineria cu a disparce!

For di 1986 te cu aña 2001, Aruba su debe nacional tabata bao control. Te cu 2001 Aruba su debe nacional tabata di 1 biyon florin. E gobierno di partido MEP for 2001 pa 2009 a fia 1.4 biyon florin uzando un intermediario riba mercado internacional. E tempo ey partido MEP a cuminsa cu e proyectonan PPP. Partido AVP a drenta gobierno na 2009 y a haci mescos. A fia 1.8 biyon florin a traves di un intermediario riba mercado internacional. Partido AVP tambe a haci uso di proyectonan PPP. Mira kico a pasa cu nos hospital; un proyecto cu hopi dia mester tabata cla.

E problema den partido AVP a cuminsa ora kier a tapa mal maneho di un ex minister di turismo cu a firma y compromete Aruba cu Aruba Music Festival pa un suma di 850 mil dollar. A lo largo e suma a termina na 2.1 miyon florin cu pueblo di Aruba mester paga p’e. Pa via cu partido AVP a tolera e mal maneho di e ex minister, awe nan ta sinta cu e problema. Si AVP a actua corecto, anto awe ta partido MEP lo tabata mal para pa malversacion di placa di pueblo. E tapamento aki no solamente a sali pais Aruba di malo sino el a trece problema interno den partido AVP cu a resulta den un kiebro y nos ta kere cu ainda tin mas cu lo bandona partido AVP.

Partido MEP ta haci manera no a kibra un copi, pero nan tambe ta forma parti di e mega debe di mas cu 2 biyon florin cu nan a crea for di 2017 pa 2022. Locual cu partido MEP a haci ta refinancia debenan pa e añanan nos dilanti y locual cu ta spera nos futuro generacion ta debenan. Nan tin 6 aña den gobernacion y e unico proyecto cu nan tin ta medida riba nos pueblo. Medida riba nos grandinan, medida riba nos studiantenan y medida riba e clase trahado y mas pio ta esnan sin trabao. Durante di e 6 aña di gobernacion aki nos por mira cu cada dia cu pasa nos pueblo a perde speransa di un haya un alivio.

Partido Curpa a participa na 2009, 2017 y 2021 na eleccion. Mi persona a bira lider di partido Curpa un luna prome cu eleccion na 2021 y ta dificilmente den un luna di tempo hiba un campaña exitoso. Mi persona a wordo pidi pa sigui den politica paso hopi ta kere cu mester tin espacio pa un partido Cristian cu ta para pa principionan di Dios cu ta biba den e curason di esnan di fe Cristian y akinan nos ta referi catolico (e grupo mas grandi na Aruba), protestant y otro denominacion cu ta kere den Cristo. Esaki a haci cu for di 2021 nos a bin ta laga nos bos como un partido Cristian resona.

Partido Curpa ta e unico partido cu no ta hala for di e principionan di Dios. Dios su leynan no ta negociabel. Nos ta kere cu esaki ta e tempo pa duna partido Curpa e sosten pa demostra cu solamente pone nos confiansa den Dios, Aruba lo lanta back riba pia. For di Status Aparte te cu awor ta esnan cu ta yama experto a goberna Aruba y a hiba Aruba den e abismo cu nos ta den actualmente. Nos parlamento no ta funciona paso tin suficiente motibo pa investiga ministernan cu a viola e ley di Compatibilidad y e rapportnan ta demostra mal gobernacion y echonan castigabel pero e tristo ta cu parlamentarionan supuestamente Cristian a vota pa tapa mal gobernacion en bes di a laga haci un investigacion. Ni partido MEP ni partido AVP tin solucion pa Aruba paso nan y tur otro partidonan no ta para pa principionan di Dios por lo tanto Aruba no por wordo bendiciona. Ora bo ta bay contra Dios su leynan locual ta bin ta maldicion y esaki awe nos tur ta bibando. Aruba mester un cambio y solamente si bolbe back na Dios nos lo mira e grandesa di Dios. E poder ta den man di nos pueblo Cristian pa trece e cambio y unico alternativa ta partido Curpa.