Mayoria di nos grandi ta biba di un pensioen. Si nan ta single ta un pensioen di 1200 florin. E cos aki ta un hilaridad  e manera con nos ta trata cu nos grandi y asina  ta papia cu nan nos grandi nan na pecho. No papia mes di e medida di AZV cu e eigen bijdrage y di prijs di comestible ta subi cada rato subi na supermercadonan.

E situacion no ta bira mas dificil pa nos grandi solamente pero tambe e clase medio ta sintie caba den nan cartera.  Aruba no ta produci nada y nunca gobierno a pone esaki riba lista di prioridad. E situacion  na America ta birando cada di pio y nan mes tin escases di alimento caba. Aruba tambe mester habri su wowo paso nos ta bay tin escases di alimento. Prijs di container a subi y esaki tin efecto directamente riba tur cos cu ta wordo importa. Riba dje e ta tuma mas dia pa e container nan yega Aruba.  Informacion cu nos tin ta cu tur locual cu actualmente ta 0% lo subi cu 6% y sin papia mes di BTW di 12.5% cu tin como fecha 1 di januari 2022.

Nos problema social ta grandi y lo empeora cu mas medida. Nos sa cu e firmamento di COHO, e diabierna scur di 13 di November 2020, a haci Aruba coho. E tristo ta cu no tabata tin un cumbre real pa asina nos por defende nos isla di coho. Tur cos a bay den secresia. Tempo lo demostra con barata Aruba a wordo bendi cu e Hulandesnan pero sa locual cu bo sembra lo bo recoge sigur.  Tempo a descubri Aruba na  aña 1499 e Spaño nan a yama Aruba pa islanan inutiles. Esaki ta danki na e maneho di nos gobernantenan tur e añanan y nos mes, paso ta nos a pone nan eynan.

E pueblo di Aruba mester habri su wowonan pa no permiti e Hulandesnan haci cu locual cu a tuma luga na nos hermana isla Boneiro. E Boneriano nan no a haya e mesun status cu e Hulandesnan como gemeente. Despues di 11 aña ainda nan ta bringa e igualdad. Nos pueblo di Aruba no mester permiti esaki tuma luga. Esaki ta pa kico cu Hulanda ta boga pa habri porta pa tur hende. A parti belasting tur caminda pa haci e bida di yiunan di tera mas dificil cu e ta caba.  Aruba no mester permiti e cosnan aki paso na final di cuenta nos yiunan di tera lo keda sin trabao.

E simannan nos dilanti nos lo mira un aumento di costo di bida di 30% y esaki ta paso tur prijs a subi for e compra te cu e cu transporte. Tur siman cu bo bay supermercado prijsnan ta cambia. Nos gobiernonan nunca tabata tin agricultura na pecho. Tur cos ta indica cu lo bay tin scarsedad di alimento. Nos ta prepara pe?

Mira e bon kico tin para den e Landspakket: E1. Lo realisa un analisis integral di maneho actual di mercado laboral, ley y regulacion ta ser ehecuta a base di cua ta actualisa y modernisa e mercado laboral. Den e analisis ta inclui medida manera reduccion di ora di trabou, trabou part-time , contract temporal, suavisacion ley di kitamento di trabou, eliminacion di obstaculo pa contrata trahado stranhero, empleo ilegal y lucha contra desempleo hubenil. A base di e analisis, ta desaroya y implementa proposicion. Tin cosnan bon y menos bon. (1 maart 2022)

E gobierno Hulandes te ainda ta demisionario y tin mas cu 6 luna ta negocia. Si e yega na sinta mes tur cos ta mustra di ta bai  pa un tempo cortico y esaki lo ta fin di gabinete Rutte. Hopi puyito lo bay Sali for di e macuto. E unico cos cu nos por haci pa awor ta  sigui vigila e desaroyonan di cerca.