Dia 25 di juni 2021 ultimo e pueblo Arubano a bai urna electoral pa elegy un gobierno nobo despues di e caida di gabinete dia 30 di maart 2021. Nos por corda con Raiz, despues di a sali for di e reunion cu nos gobernador, a declara enfaticamente di no ta forma parti di e complot y tabata tin plan traha forma gobierno cu partido mep.

E formacion di gobierno a tardate cu luna di September 2021 y a anuncia cu a keda cla cu particion di e carteranan ministerial. Nos por corda e acuerdo firma na vuurtoren como un acto simbolico, pero a lubida cu e luz di e vuurtoren cu supuestamente lo mester a guia e gobierno nobo no t’ey mas. E simbolismo mas bien a mustra cu for di un comienso caba e coalicion su luz tabata paga. A tarda 5 luna pa por a regla cu landsverordeninginstellingministeries cu ta regla e cartera di e respectieve ministersnan pa cual Raad van Advies a duna un conseho negativo y den cual ta recomenda 7 ministro pa e situacion economico cu Aruba ta pasa aden.

Nos ta den luna di februari 2022 y te ainda pais Aruba no tin un presupuesto cla. Pais Aruba ta manera un barco sin destino. Esaki nos por yama un maneho desastroso. Esaki no ta e amor pa nos patria tan stima, nos Aruba dushi tera.

Durante campaña nos por a tende partido mep cu nan tin e pueblo di San Nicolaas na pecho. Den luna di December 2020 partido mep tabata papia di e reapertura di refineria y cu Quanten Consortium Aruba, LLC, (https://www.quantenconsortiumaruba.com/) ta cla pa inverti 3.5 biyon di dollar pa despues bin cu un lego plan cu yama Eagle LNG cu lo emplea apenas 20 hende. Nos compania local Arugas mes tin mas hende den servicio cu locual Eagle LNG lo emplea.

Nos por corda cu San Nicolaas Business Asosiocation a presenta un plan asina bon hinca den otro cu yama “The City of Innovation & Culture”, un plan formidable. Un plan cu lo crea cuponan di trabao y cu lo ta na bienestar di Aruba en general. Despues di casi 7 luna tur hende ta lubida e promesa di campaña y San Nicolaas ta bolbe desaparese for di mapa. Ora tin eleccion ta core busca voto den e pueblo di San Nicolaas pero despues ta lubida cu e pueblo di San Nicolaas ta existi.