Cada dia cu pasa nos situacion social ta birando mas pio. E clase trahado ya no por biba di un salario minimo. Nos por mira cu tin hende ta bibando den auto paso despues di e lockdown nan a perde trabao y nan a wordo saca for di e apartamento unda nan tabata biba. Tin hende cu no tin awa na nan cas ni electricidad y no papia mes di esnan cu no tin trabao y no ta hayando trabao.
Imagina bo cu nos grandinan cu tin cu biba di un pensioen di Svb mester ainda paga un contribucion pa haya nan remedinan. Nos por mira cu despues di e lockdown hopi negoshi a cera y no conta mes cu e crisis mundial cu nos ta aden. Paisnan ta drentando recesion y aki nan gobierno no tin ningun plan di accion con pa contraresta e situacion cu cada dia ta birando pio.
Gobierno su prioridadnan ta robes. En bes di administra placa di pueblo drechi a bin hinca placa den un parada di cende mecha en bes di gradici Dios paso e situacion por ta hopi mas pio. A regala Citgo 175 miyon di dollar cual tabata destina pa limpieza di e tereno di refineria y awe nos tin un refineria cu heronan ta cay. A hinca companianan estatal den debe. WEB tin un debe di 700 miyon florin y nos aeropuerto un debe di 1 biyon florin. Den un pandemia kier economisa 60 miyon florin riba salud di pueblo. Tin placa pa duna golden handshake manera cu a pasa na WEB, na AZV y na Utilities. Kico ta e intencion di parti gobierno ta Dios so lo sa. Un cos ta sigur e pueblo no ta prosperando.
Tur caminda gobierno tin problema. Mira situacion di Serlimar, scandal di vacuna, scandal na Dimas, scandal na Arubahuis unda segun informacion e prohibicion di drenta edificio di gobierno ta cla riba mesa y scandal cu placa di fase. Trahadornan di gobierno ta rabia cu e reduccion di 12.6% di nan entrada y ta sinti e peso di aumento di costo di bida. E unico cos cu gobierno por bati riba su pecho ta e deal di Eagle LNG cu te cu awe ta keda cuestionabel. No tin claridad den e acuerdo firma. Mester a kita 2 director di WEB NV pa asina habri caminda pa logra firma cu Eagle LNG. Kier gaba cu un compania cu no tin su propio pos di gas sino tin cu subi mercado internacional pa cumpra e gas y despues bin bende cu WEB NV. Bin haci negoshi riba nos isla y hiba divisas den exterior. Nos di partido Curpa ta keda bisa cu si kier a transforma nos planta di awa di heavy fuel pa gas nos mes tin compania local cu por hacie. Na Curaçao gobierno a para duro contra Eagle LNG. Nos gobierno no a hedge y awor no solamente prijs di heavy fuel pero tambe di gas a subi drasticamente.
Nos pueblo no por carga e peso aki mas y riba dje kier bin cu medida hinca den landspakket di coho. Un coho cu a wordo firma den secreto pa nos prome minister sin cu pueblo sa e contenido di esaki. Pueblo di Aruba esaki ta e momento cu si nos kier busca Dios di curason y dobla nos rudia y pidi Dios pa actua contra tur inhusticia y cu husticia di Dios baha riba nos Aruba pa saca tur cos na claridad. Nos ta e unico partido cu for di principio a para firme pa leynan di Dios sin dobla y lo sigui para pe paso no tin otro caminda. Nos oracion mester ta Dios pone inkietud den tur esnan cu tin e obligacion den nan funcion pa husticia wordo haci y cu Dios no permiti nan drumi anochi si nan no haci nan trabao den tur honestidad y cu consenshi limpi. Nos Parlamentarionan tin e poder pa vota contra tur cos cu ta malo y no forma parti di e maldad paso nan lo cosecha di e maldad cu nan mes ta sembra. Pueblo ban uni den oracion pa nos Aruba tur anochi 7’or pm y pidi Dios interveni na nos fabor. Nos Dios ta bibo y ta scucha oracion y nos lo haya contesta mas lihe cu nos ta kere. Hendenan cu curason puro y man nan limpi ta esnan cu por lanta man pa Señor pa asina nos mira e cambio.
