Lider di partido Curpa, Eric Ras: Seguridad di nos pueblo y di polis mester bin na prome lugar

Partido Curpa ta haya rason cu nos miembronan di nos Cuerpo Policial a wordo maltrata pa tur e gobiernonan. For di 1987 cu a basha e warda di polis ningun gobierno a percura pa Districto di Oranjestad tin warda di polis cu ta cumpli cu un standard di un warda di polis. Polisnan ta bira malo y gobierno no ta worry cu nada.

Berdad ta cu si bo tin amor pa e trabao di polis bo ta lucha te na final. No manera otronan cu ta bandona nos Cuerpo Policial pasobra nan no tin amor pa e trabao di polis sino solamente e puesto y haci uso di e trabao di polis pa un miho trabao otro caminda. Un ehempel ta e sucedido na Arubahuis. A duna e minister plenipotenciario e oportunidad di paga locual el a malversa mientras intencionalmente nos minister president a wanta e rapport di Central Accountant Dienst scondi. Si tabata un miembro di oposicion sinembargo si lo a forsa pa detene. Lider di MEP ta yama partido AVP Universidad di corupto. Universidad di kico e prestigioso partido MEP ta awe? P’esey ora bo scupi na halto bo ta core e peliger cu e lo por cay den bo cara. Despues di a tilda partido AVP di corupcion awor e corupcion ta den nan mesun seno. No por lubida cu Arubahuis ta cay directamente bao di nos minister president.

Nos partido Curpa for di 2017 a bin cu un plan pa recluta mas polis pero e plan ey nunca por a wordo implementa pasobra partido Curpa no ta den gobierno. Durante nos Status Aparte for di 1986 te cu 2007 tur aña tabata tin opleiding pa polis. For di 2008 te cu awor tin 6 biaha cu no tin sanger nobo ta drenta nos Cuerpo Policial y si partido MEP keda den gobierno na 2024 tampoco lo no recluta mas polis mientras polisnan ta bandona nos Cuerpo Policial y otro ta bay cu pensioen. Mayoria di esnan cu a studia na Hulanda pa bira inspector di polis no t’ey mas. A uso Cuerpo Policial pa haya un miho trabao y miho salario.

Nos Cuerpo Policial falta hopi material mientras e polisnan ta lucha cu alma y cuerpo pa duna servicio. Sr. Arnhem a bisa bon cla cu polisnan ta cansa y e ta preocupa pa nan salud. Un Cuerpo Policial cu no tin material e.o. bulletproof vest, uniform y auto drechi pa core aden mientras gobierno si ta lease e autonan di mas caro mientras cu nos polisnan ta sigui wordo maltrata. Ta usa e pretexto cu a duna nan promocion, pero ta lubida di bisa cu nan tin derecho riba dje. Nos por a ripara cu for di 2008 e trend aki a cuminsa y nan plan pa laga nos Cuerpo Policial sangra muri pa asina habri porta pa busca polisnan Hulandes bin traha na Aruba. Diferente biaha den pasado nos Cuerpo Policial a conoce polisnan Hulandes. A carga nan den teblachi y despues di a pasa vakantie ta bay Hulanda cu miho salario.

Gobierno forma pa MEP y AVP no a duna nos Cuerpo Policial su debido atencion. E protocolnan firma den pasado di tanto gobierno MEP y AVP awe ta bira realidad. E minister di husticia anterior a firma un acuerdo pa e miembronan di RST integra den nos Cuerpo Policial. Nos por corda con ora e baranan di oro a desaparece, e hefe di RST a tene esaki hermeticamente cera pa ningun hende haya sa kico a pasa cu e oro. E persona encarga cu e baranan di oro a entama un caso y a gan’e den corte. Un cos si nos por a mira ta con nos departamento di droga, cu a haya reconocimento den internacional pa nan bon trabao, a wordo kibra pasobra ta nos polisnan Rubiano tabata na cabez. Un netwerk cu pa hopi aña di sacrificio a wordo crea, a bay perdi. Nos por mira cu mas y mas marechaussee ta bin traha na Aruba. E tempo cu burico ta traha pa cabay come a pasa. Nan no a keda solamente na frontera sino nan ta tur caminda. Nos gobierno a bende nos departamento di husticia cu e Hulandesnan.

Mi no sa cu ki cara gobierno kier negocia pa habri frontera cu Venezuela. Dollar ta manda awor na Venezuela y beneficio esaki lo no trece pa pueblo di Aruba sino mas problema cu nos isla no por mas. Nos ta kere cu awa a pasa hariña. Nos Parlamento cu ta yama pa sali na defensa di nos pueblo no ta funciona pasobra si tabata tin parlamentario cu curashi y principio, gobierno aki lo a yega na su fin. E husticia di Dios lo bati na boso porta. Situacion lo bira asina critico cu boso lo sali na careda. Pueblo di Aruba lo pasa den duro pero cu speransa y fe den Dios Aruba lo lanta y briya.