Segun relato di CAFT for di November 2018 te cu dia di awe gobierno no a cumpli cu nada di e acuerdonan cu e la firma cu Hulanda. Despues cu gobierno a haya un deadline nos por mira cu no tin cambio den maneho di gobierno.
E actitud aki tin henter nos pueblo perhudica y pobresa ta sigui aumenta. Nos por a lesa cu e gastonan di personal y landsbijdragen di empresanan estatal tambe a aumenta. Ta p’esey entre otro gobierno a kita directornan pa usa empresanan aki pa sigui duna hende trabao y no tin produccion? Si ta asina nos companianan estatal ta bay haya nan cu tempo den problema financiero.
Nos tin 4 aña perdi pa motibo di tin un gobierno cu no tin curason pa sufrimento di su pueblo y nos tin un parlamento cu ta tapa pa gobierno. Nan ta complice di gobierno su mal maneho. Nos finanzas publico ta un desastre. A blame e gobierno anterior di mega debe, pero nan ta pio cu e gobierno anterior. Ki dia nos ta lanta for di soño y pone un paro na abusonan aki. Mentira tras di mentira gobierno ta sigui cu’ne. Geen wonder nos promer ministro ta bisa “ze geloven mij niet”.
Diabierna ultimo Conseho di Minister di Reino a trata e recorte salarial di 12.6% y a pone 4 condicion cu gobierno di Aruba mester por cumpli cu’ne prome cu bin cu e recorte.
- recorte di e directornan di empresanan estatal.
- recorte salarial mester wordo hinca den e presupuesto.
- no por tin deficit mas den e presupuesto.
- recorte di 25% di e politiconan lo mester keda na vigor.
Awor tin un otro escandalo den salubridad despues cu a detene un ortodontista cu no tin diploma pero cu si tabata cobra mas cu 600 mil florin pa aña. Con por ta posibel ta permiti cu un persona cu no tin diploma ta haya aprobacion pa traha como orthodontista.
Unda e screening a faya? Riba dje nos por a tende cu un parlamentario di Mep su compania a haya un contract for di AZV. E cos aki no ta conflicto di interes? Parlamento ta keto y no ta bisa nada. Esunnan cu ta sigui sostene gobierno pa un medaya y otro ta haya un banquete.
Un otro situacion ta cu ni nos Prome-minister ni nos Minister encarga cu Dimas no kier bin duna cuenta na Parlamento riba e caso di Arubahuis y veredicto di hues cu sra. Paskel a entama. Ta un tristesa di mira politica barata ta sigui y no kier lanta para y bisa e Minister cu ta Parlamento ta bo doño di trabao. Ta hopi cuenta e Minister aki mester duna paso den casi tur cos e tin problema.
Nos presupuesto 2022 tin un deficit di 236 miyon. Prome cu pandemia gobierno no a haci nada pa drecha nos scolnan. Ta sigui gasta placa riba huur di edificio y riba dje ainda kier economisa riba nos enseñansa. E werksternan te cu dia di awe ta biba den un incertidumbre. Tur cos ta mustra cu lo bay tin un aumento barbaro den schoolgeld den e aña escolar cu ta cuminsa memei di augustus. Maestronan ta busca otro horizonte paso situacion ta birando pio aki na Aruba. Na EPI tambe ta limita na direccion di studio pa nos studiantenan. Pues escandalo tras di escandalo y ningun intencion pa atende cu e problemanan grandi cu ta afectando nos pueblo. Un politica di “laissez faire, laissez aller” esta “los laga bay”,mientras pueblo ta sclama pa un alivio.
Awor Aruba ta bay implementa e agenda satanico di 2030 conhuntamente cu Hulanda. Un agenda cu mentalidad comunista. E comunista ta contra capitalista paso e kier tur cos pa su so. Mira partidonan cu tin ideologia social democratico tur ta comunista.
Capital ta pa nan y miseria pa pueblo. Gustavo Petro president electo di Colombia a expresa cu bo no por laga e pobernan progresa paso nan lo pasa pa e derechistanan y e ora ey e comunista ta perde su poder. Pesey segun Petro su expresion semper bo mester mantenan pober pa bo por keda na poder.
Gobierno no ta saca man pa yuda ningun hende y awe nos por mira e miseria rond aki na Aruba. Ningun di e partidonan aki tin solucion pa Aruba paso nan ta causante di locual cu nos ta bibando. Unico salida pueblo ta nos busca cara di Dios pa nos tin solucion pa nos problemanan. Sabiduria di Dios lo pone Aruba riba pia paso sabiduria di hende y kere den tur cosnan falso cu ta bay contra Dios su boluntad tin nos awe unda nos ta.
