Aruba a keda pega den tempo. Durante e ultimo 5 aña no a bin ningun proyecto cu a crea cuponan di trabao. Despues di e ciere di nos refineria no a haci nada pa bin cu un pilar economico. A bin cu mas hotel, pero Aruba no por keda para riba un pia so.

Aruba mester diversifica su economia pa asina por trece placa den caha di gobierno pa por paga debe cu a wordo crea den e ultimo 20 aña.

Por fin nos por a mira cu a cuminsa renobacion di Aloysius School na Noord. Nos por corda cu a basha school Frere Bonifacios, pero te cu awe no a traha ningun scol na e lugar. E edificio di Juliana School y Beatrix School ainda ta para pa wordo renoba. Enseñansa den ultimo 5 aña no a haya atencion di parti di nos gobierno. Un cos mester bisa cu a tene e werksternan mas cu un aña na linea paso tabata den porta di eleccion, pero despues a duna nan un bon scop. Nos maestronan ta disgusta y ta bandona nos isla pa un miho porvenir.

Riba tereno di salubridad tampoco nos ta mira cambio. Basta dokter a bandona nos isla caba paso nan a haya miho trabao otro caminda. Mientras tanto a papia tanto riba e parti di salud mental pero te ainda nada di finanzas. Cada dia cu pasa e situacion ta empeora.

E planta na Bubaliplas tabata den noticia mas cu un aña caba y nada no ta wordo haci pa remedia e situacion cu e planta ta aden. Segun nos por a compronde den e presupuesto no a pone placa pa atende e urgencia cu e planta ta aden. Dios spaar nos cu nada malo paso e lo ta desastroso pa nos isla.

Gobierno a presenta un presupuesto 2023 sin pia sin cabes y ta bay linea recto contra e conseho di CAFT. Reunionnan di Parlamento ta carece di seriedad y ta un berguensa nacional. Un Parlamento cu no tin voz y ta baila riba ritmo di gobierno. Gobierno ta mira e splinter den wowo di tur hende pero ta miho e saca e balki for di su wowo. For di un gobierno comunista bo no por spera otro. Hulanda su gobierno tampoco ta miho. Rond mundo e gobiernonan comunista a cuminsa cay y asina nan lo perde nan poder. Gobierno ta sigui pusha e agenda 2030 y nos por a mira cu e biahe pa Merca no ta nada otro cu e agenda 2030.

Pueblo di Aruba a cansa di un gobierno mentiroso. Un gobierno cu no ta briya mas y su shinishi lo wordo tira na troncon di mata. Pueblo di Aruba tene pasenshi paso lo yega e dia cu nan lo basha den otro. Nan dia, nan ora tin fecha. Un gobierno cu ta contra su pueblo lo no prospera.

Pueblo di Aruba nos ta den e tormenta y ta bay tin scarsedad di cuminda. Aki na Aruba nos no ta prepara. Mas cu 40% di nos pueblo tin’e dificil caba. Na Hulanda a haci apelacion riba gobierno pa yuda pueblo cu no tin placa pa come. Te ainda e boeren nan na Hulanda ta den protesta paso kier kita nan tereno for di nan. Hulanda cu ta un di e productornan di mas grandi di alimento di mundo. Na Italia ta mira hende ta para den rij pa haya cuminda paso nan no tin placa.

E agenda 2030 cu e gobierno ta forma parti di dje ta contra di e existencia di e famia. Ora un gobierno ta bay contra leynan di Dios, pueblo no por spera bendicion di Dios. Dios a kita su piyama y a bisti Su toga y E tin e martiu den su man pa dicta e sentencia contra di tur inhusticia. Mira pa no ta forma parti di inhusticia. A nos como ciudadano patriotico tin e deber di sali na defensa di nos Aruba dushi tera y tin e tarea di trece e cambio pa nos tin un miho mañan.