Lider di partido Curpa Eric Ras : Partidonan di coalicion a prefera sirbi interes di partido cu interes di pueblo FASE

Dialuna 4 di july 2022 tabata un dia scur den historia di Aruba. E proyecto di FASE cu riba su mes tabata un bunita proyecto, a wordo secuestra pa esunnan cu a mira e oportunidad pa haci mal uso di dje y comete corupcion. Algemene Rekenkamer y Central Accountantdienst a señala fayonan garafal y a cuestiona e mal maneho cu e ministernan a comete. Ministernan cu ta responsabel pa e miyones cu a wordo malgasta den fase. Un ciego mes lo a wak cu manera fase a wordo duna ta un desastre.

Durante campaña 2021 e minister a propaganda cu si bo kier pa FASE continua lo bo mester vota pa mep. Hopi ta esunnan cu a aplica pa FASE cu no a haya nada y tampoco no a haya ningun contesta pa ki motibo nan peticion no a wordo honra. Parce cu pa bin na remarca pa haya fase lo bo mester ta pertenece na e partido. Nos parlamentarionan di coalicion mester tabata den un estado di alerta hopi grandi pa e uso cauteloso di placa di pueblo. Lamentablemente no nos parlamentarionan di coalicion no a haci nan tarea sino a vota pa tapa mal maneho y corupcion di nos ministernan cual pa ley ta castigabel.

Segun e rapport di Algemene Rekenkamer ta incomprendibel cu gobierno despues 18 luna desde introduccion di FASE ainda no a introduci un cuadro legal pa esaki. Algemene Rekenkamer ta cataloga e otorgamento y pagamento di FASE como uno ilegitimo. Ademas den e rapport di CAD tin para cu e informacion ta insuficiente y/ of inapropia pa conclui cu mas persona cu ta aparece varios biaha bao di diferente number di identidad of number personal. Si e ley wordo aproba finalmente pa Staten mes, e pago haci durante 2020 pa fase ta contra di nos Comptabiliteitsverordening. Aunke cu FASE a wordo hinca den e begroting di 2020 no ta significa cu e pagamento di FASE na 2020 tin base legal. Esey kiermen cu e ta keda ilegal. No tin hustificacion pa e acto aki y e minister ta keda responsabel.

Riba 26 di mey 2021 esta un luna prome cu eleccion e ley a yega Parlamento y ta te dia 4 di juli 2022 e ley a wordo aproba pa coalicion den Parlamento di Aruba. E minister a hinca den e concepto di ley un gedekteverklaring (un convenio pa kita e responsabilidad). E convenio aki ta pa kita tur responsabilidad financiero cu lo mester cay riba e minister cu ta hinca den articulo 31 di nos ley di comptabilidad.

Articulo 27 di Comptabiliteitsverordening ta papia di un interes financiero te cu 100 mil florin of mas tin un apoderado di entidad legal obteni pa medio di un ordenansa nacional (landsverodening) cual no ta existi. Articulo 28 di nos comptabiliteitsverordening ta papia di donacion na tercera persona cual suma te cu e suma di 10 mil florin of mas y respalda pa un decreto cual tampoco ta existi.

Conscientemente e minister a hinca e artikel 9 lid 2 den e ley caminda e minister encarga ta wordo exonera for di tur actonan y actonan huridico cu lo por tuma luga. E ley ey ta bay contra di articulo 31 di comptabiliteitsverordning. E ta un hecho castigabel pa ley y e minister ta keda castigabel y e minister lo no scapa for di dje. Na 2020 no tabata tin ley y no tin forsa retro-activo. E actonan aki ta uno premedita y a malgasta placa di pueblo.

Deliberadamente a stroba e institucion nan manera ARA y CAD di haci nan investigacion paso no a laga nan mira e dossiernan. Apesar di a pidi mas cu un biaha. Nos mester bisa cu ta mas cu logico cu no por a yega un investigacion pa duna un bista real con e placa di pueblo a wordo malgasta. Nos por a saca afor cu 156 parttimers cu tin derecho riba pensioen tabata cobra awg.450,= na fase y despues a aumente na awg.950,=. Tabata tin 420 transaccion cu e yega na e suma di 210 mil florin cu a paga. Tin 38 no residente cu a cobra FASE na e suma di 77mil florin y 2 morto cu a ricibi e suma di awg.4750,=. Tin hende cu pensioen y cu vut a haya un suma mas halto cu awg.950,= pa luna na fase. Tin 48 persona cu via di bienes y servicio ta cobra gobierno tambe a cobra FASE na un suma di awg.235.270,= Asina nos por sigui nombra mas hende cu a ricibi placa via fase. Nos por papia cu no tin actonan castigabel ainda pa ley?

Increibel con nos Parlamento no a defende interes di pueblo di Aruba sino nan propio interes. Un berguensa pa nos parlamentarionan Tevreden, Guedez y Berlis cu a vota pa busca moda pa sconde maldad di e gobierno aki. Si bo ta den posicion pa haci bon y bo no ta hasie anto e ora ey bo mas culpabel esunnan cu ta haci malo. Un complice bo ta bira.