Lider di Partido Curpa, Eric Ras: Partido Curpa ta unico partido cu ta para pa e fe cristian

Nos ta bibando den un tempo na unda strategia ta wordo usa pa logra metanan cu ta carece di moralidad. Kico ta moral y kico nos por compronde bao di inmoralidad.

Un hende cu haci mal uso di su funcion ta mas inmoral cu ora un gobierno permiti pa bruha nos criaturanan cu no conoce bida wordo desvia pa peliculanan of materialnan di pornografia gay na nos scolnan? Cual di 2 ta mas inmoral un ministro/parlamentario cu haci malo of e doctrina di maldad nan nos scolnan? Ta bon pa pensa cual ta mas inmoral of ta cataloga tur 2 mesun cos?

Si nos mira cu nos wowo spiritual kico ta pasando rond di nos, anto nos lo ripara cu nos ta den un problema serio. Satanas ta bin bisti cu trahe di carne. E ta laga pasa di un super bon hende. E ta bin cu 2 agenda, un pa e por gana bo simpatia. Despues di a gana bo simpatia y e tin bo den su man e por haci tur locual cu e kier cu bo y asina destrui bo. E ora ey bo no ta mira e realidad mas y bo ta ciego pa e berdad. Nos por mira cu den e tempo actual hopi ta usa e strategia di Machiavelli di dividi pa asina conkista y asina logra metanan corumpi. Ora un pueblo ta dividi ta mas facil pa un gobierno logra su metanan. Esaki ta locual cu nos bibando actualmente.

Nos ta kere cu Aruba ta wordo goberna pa hendenan cu ta stima nos isla? Den nos Parlamento tin hende cu ainda nan curason ta bati pa nos Aruba dushi tera? Un gobierno cu tin casi 6 aña na poder y nos por mira logronan? Tur e gastamento di e biahenan rond mundo a hiba nos isla pa dilanti y ta mas bien un biahe di placer? Ken ta esun cu tin cu sacrifica pa tur e biahenan sin logro aki?

Aruba ta wordo manipula pa e gobierno Hulandes. E gobierno Hulandes ta duna nos gobiernonan den e ultimo 20 añanan pa bay horca nos pueblo pa ora Aruba su lomba ta contra di muraya, ta locual cu nos ta bibando awe, bati na su porta. Mientras nos gobierno ta sigui coba e pos mas hundo, gobierno Hulandes ta contento paso Aruba ta keda sin dignidad y sin autonomia. Ora di bati na su porta e gobierno Hulandes ta bin cu su exigencianan. E gobierno di Hulanda ta miho cu esun di Aruba? Nos contesta mester ta absolutamente cu no.

Nos por a tende parlamentario di CDA ta reacciona pa via di e 200 miyon pa yuda islanan Caribense. Pa tiki miyon ta hinca dede den wowonan di nos pueblo pero e biyones cu ta wordo manda Ucrania no ta papia nada di dje. E locura di kita tereno di agricultornan pa motibo di stikstof ta apoya e gobierno Hulandes cu e plan globalista. E pueblo Hulandes ta bibando den miseria mientras gobierno Hulandes ta regala biyones di euro na Ucrania.

Pueblo di Aruba nos ta den mita luna di april 2023. Pueblo corda riba e ley di matrimonio di mesun sexo cu mester bay Parlamento pa wordo trata. Tin yen cos ta pasando rond di nos, p’esey ban laga nos habri nos wowonan hancho y mira e movecion di gobierno. Gobierno ta campeon pa desvia atencion pa asina nan logra nan metanan. Aruba no por sigui bay di gara di regimen comunista. E agenda globalista ta bunita hinca den otro pero na final nos lo ta un pueblo sin libertad y sin privacidad. E agenda globalista aki ta pa caba cu e famia crea pa Dios y persigui tur esnan di fe Cristian. Akinan no ta importa si bo ta catolico, protestant of otro denominacion cu ta kere den Dios. Un ehempel ta locual ta pasando cu e misanan catolico na Nicaragua. E globalistanan ta sconde durante eleccion tras di privacidad di informacion pero den e identidad digital nan tin tur bo informacion cuminsando for di bo secreto medico te cu salario y cuenta di banco. Eynan si bo no tin privacidad.

E pueblo Cristian no tin representante den Parlamento di Aruba. E agenda 2030 cu ta un agenda diabolico ta sigui su curso sin ningun resistencia. Esaki ta tempo di husticia di Dios paso tur e partidonan cu a bay contra e leynan di Dios nan dia lo yega. Nos oracion mester bira pa Dios sigui habri nos wowo spiritual. Esaki ta tempo pa para leynan di Dios pa ricibi Dios bendicion y no apoya leynan cu ta bay contra leynan di Dios pa ricibi maldicion. Partido Curpa unico partido cu ta sali na defensa di e famia y ta e alternativa pa e pueblo di Aruba Cristian.