Lider di partido Curpa, Eric Ras: Partido Curpa ta e unico partido na unda leynan di Dios no ta negociabel

Nos ta bibando den un tempo di hopi turbulencia na unda lastimamente den ultimo tempo nos ta tende solamente di maldad. Tur cos tin su tempo y e maldad su tempo tambe lo caduca, pero esaki lo depende si wowo di nos pueblo habri y distingui entre e bon y e malo.

Si scoge pa un partido politico cu ta honra Dios su principionan lo bay nos bon y si nos scoge pa un partido politico malo lo bay nos malo. Un cos ta sigur no ta existi mita malo ni mita bon. Esaki ta mustra nos cu e palabra di Dios ta real paso locual cu bo sembra lo bo cosecha tambe. Scapa lo nos no scapa. Lastimamente nos tin gobernantenan cu ta papia di Dios pero nan echonan ta demostra cu nan curason ta leu di Dios. No ta existi un pia den mundo y un pia den cielo. Ora nos gobernantenan ta introduci leynan cu ta contra Dios su mandamento ta keda demostra cu den nan curason nan no por tin temor di Dios.

Ultimo 22 añanan no a conoce gobernantenan malo cu no a sa di administra placa di pueblo. Gobernacion di partido mep for di 2001 pa 2009 a hinca Aruba den un debe awg.1.393.000.000. Berdad e malo semper ta studia con pa viola ley pa asina logra su metanan. Pa Aruba subi Mercado internacional pa fia placa gobierno mester haya aprobacion di Rijksministerraad. Esaki ta conforme articulo 29 di Statuut der Koninkrijk der Nederlanden. Na November 2000 partido mep a organisa un manifestacion cu a desenboca den boltermento di un auto y a kibra den parlamento pa via di racetrack y cu Aruba ta bancarota. Na 2001 partido mep ta gana eleccion y ta drenta gobierno. Un partido social democrata pero ta mustra mas un partido comunista paso den e periodo di gobernacion aki ta nace BBO y ta malgasta casi 1.4 biyon florin di un pais cu supuestamente ta bancarota. E interes aki no ta sali nos pueblo barata paso 2 biaha mester paga interes. Prome na e banco internacional y e di 2 na e banco local. E debe tin un fecha y ora e yega e mester wordo paga den un biaha.

Partido avp a drenta gobierno na 2009 y gobierno no a baha gasto y a sigui cu e wega di debe. Durante gobernacion di avp e debe a yega casi awg.1.800.000.000,=. Si nos conta e 2 debenan di e gobernacion di partido mep y di partido avp nos ta yega na awg.3.200.000.000,=. Na 2001 nos debe nacional tabata casi 1 biyon florin y si na 2017 gobernacion di partido mep a haya nos debe nacional na 4.2 biyon florin, con bin awe despues di 6 aña di gobernacion di mep nos debe ta riba 6 biyon florin? Unda e 1.8 biyon florin den e ultimo 6 aña di e gobernacion aki a bay. Partido mep su gobernacion a malgasta mas 500 miyon (1989/1994) +1.4 (2001/2009) + 1.8 (2017/2023) pa un total di 3.7 biyon florin y durante gobernacion di partido avp ta 2.3 biyon florin (500 miyon y 1,8 biyon). Partido mep ta un partido di medida y ta aplica e lema di World Economic Forum pueblo lo no tin nada y pueblo lo ta feliz.

Nos a pasa mita di luna di april y nos minister president ta asumi cu entre april y mei 2023 e ley pa trata e matrimonio di mesun sexo lo yega Parlamento. Nos di partido Curpa ta expresa diferente biaha cu si e ley aki wordo trata den Parlamento lo tin como resultado 15/16 cu lo vota na fabor y 6/5 cu lo vota contra locual cu lo haci cu e ley aki lo wordo aproba. Den bista di Dios un Cristian no por hustifica pakico ta sigui forma parti di un partido cu ta bay contra leynan di Dios. Partidonan cu apoya maldad no por gosa di e bendicion di Dios. Partido Curpa ta e unico partido na unda leynan di Dios no ta negociabel. E unico partido cu ta pro famia institui pa Dios.