Diahuebs 16 di maart 2023 a tuma lugar e reunion di Parlamento caminda coalicion a exonera ex-minister Briesen di e pago di 2.1 miyon florin relaciona cu Aruba Music Festival. Contrario na locual cu parlamentarionan di coalicion kier a hustifica, e festival aki tabata mas bien malgastamento di placa di pueblo.

Na aña 2007 e festival aki a costa pais Aruba e suma di $960.000,= y e director di Aruba Turism Authority ta haya cu ta un gasto completamente infunda y irasonabel (ongegrond en onredelijk). Riba dje e festival aki no tabata bon bishita y no por papia di un return of investment. Banda di e festival aki ATA mes tin extra gasto door di promove e festival aki pa atrae turista pa nos isla. E gastonan total ta surpasa riba $1.000.000,=. Kiko tabata e meta di gobierno di mep aki pa despues di casi 6 aña di gobernacion pa exonera e ex minister pa malgastamento di placa di pueblo cu asina hopi interes?

Despues ATA ta pone enfasis na e minister pa laga ATA mes negocia cu Lee Tofanelli cu ta encarga pa organisa Aruba Music Festival. E conseho di ATA ta pa baha e contribucion te cu na $500.000,=. ATA a conseha e minister di turismo y Transporte e tempo ey pa parti e sponsorship den 2 parti den aña 2008 y 2009. Den e carta di 8 maart 2008 minister di turismo a bay di acuerdo cu e proposicion di director di ATA pa reduci e ayudo financiero na maximo suma di $600.000,= y pa 2009 na un maximo $500.000,= pa organisa e Aruba Music Festival. Den e decreto ministerial e minister di turismo ta desvia di e acuerdo y ta firma un acuerdo na balor di $850.000,= cu Lee Tofanelli. Contra di conseho di ATA e minister di Turismo a bay di acuerdo pa e suma di $850.000,= . Den un carta fecha 29 di juni 2009 na Minister di Turismo, ATA ta bisa di pone e suma di $550.000,= manera acorda. Riba dje ta firma un acuerdo Production Service Agreement dia 1 di October 2008 pa 2010, 2011, 2012 y 2013. Cu ki ta bai di acuerdo cu un festival cu ta gasto so ta trese pa nos isla?

Den un carta di 22 di januari 2010 di Central Accountantdienst na Minister di Turismo y Transporte ta bisa cu e acuerdo firma dia 1 october 2008 e minister a viola artikel 25 y artikel 31 di Compabiliteitsverordening. E mesun artikelnan aki ta haci e minister personalmente responsabel. Un cos cu a hala nos atencion ta cu a yega na un acuerdo dia 1 di October 2008 y te dia 11 di September 2009 minister di Turismo ta firma e acuerdo. Dia 25 di September 2009 Aruba a bay urna electoral cu como resultado cu gobierno di mep a bay cas.

Manera ta custumber e gobierno actual no sa kiko ta integridad paso conscientemente y continuamente ta viola e acuerdonan di bon gobernacion. Mas tristo ta cu nos tin parlamentarionan cu ta bisa di ta Cristian y ta forma parti di hechonan castigabel den e gobierno aki. Riba dje ta vota 11 parlamentario na fabor pa exonera ex-minister Briesen di e suma di 2.1 miyon florin. Esaki ta demostra cu nos tin un coalicion cu ta forma parti di un gobierno cu ta maltrata nos pueblo y continuamente ta viola nos leynan. Locual cu nos Parlamento ta refleha ta cu na Aruba no ta existi democracia y cu Aruba ta biba bao di un regimen comunista. Pueblo no tin voz mas y a perde su libertad.

Nos di partido Curpa ta condena e manera cu e gobierno comunista ta goberna nos isla. Den boca di pueblo a cuminsa resona cu partido Curpa ta e unico alternativa pa un cambio. Partido Curpa lo sigui lucha pa e famia institui pa Dios y cu Fe den Dios nos lo mira cambio. Nos sa cu pueblo ta desea di mira un cambio pero pueblo di Aruba tene pasenshi. Dios tin Su tempo destina pa Aruba. Pueblo di Aruba no perde speransa.