Nos a drenta luna di Augustus cu hopi reto nos dilanti. Nos por a tende cu tin 16 docente cu a termina nan studio y no tin trabao pa nan. Nos tin informacion cu tin mas maestro ta bandona Aruba pa bay residencia na Hulanda, paso eynan ta wordo miho paga y miho beneficio di trabao. E werksternan for di aña pasa prome cu eleccion a wordo teni na linea pa gana nan voto y pa despues duna nan un bon schop. Awor gobierno ta laba man y a tira nan den scochi di SKOA. Nos por mira cu nos isla ta wordo goberna manera un galiña sin cabez.
Nos salud mental mester un ayudo urgente y nada ta wordo haci pa trece un cambio. No ta for di awor sino ta for di aña pasa nos di partido Curpa a busca informacion riba e aspecto aki. Nos por a tende cu si Respaldo no haya e finanzas cu nan mester, nan no lo por duna un servicio optimal y nos salud mental lo ta den un problema hopi serio. Gobierno no ta aloca fondo pa salud mental y ta un institucion cu no por neglisha. Esunnan cu mester ricibi ayudo no ta hay’e pa falta di finanzas. For di tempo cu Aruba a haya su Status Aparte ningun gobierno a haci algo pa e institucion aki. Si no tin fondo e personanan aki lo bay riba caya y e prome yama ta nos cuerpo policial. Nos no mester lubida kico a pasa cu un polis caba. Esaki no ta solamente polis sino henter nos pueblo ta wordo poni den peliger sin cu tin mester.
Lamentablemente nos pueblo no por spera un alivio tampoco. Alcontrario nos pueblo lo mester siña aun mas pa hala faha mara paso mas medida ta na caminda. Esaki nos por a conclui despues di a lesa cu nos Prome-Minster ta haci todo por todo pa evita un “aanwijzing”. E ta un berguensa pa constata cu nos tin un gobierno cu no ta cumpli cu locual e la bisa. Un gobierno cu ta papia hopi pero ta haci nada. Un gobierno sin integridad. Esaki ta e gobierno cu ta marca historia di ta e peor gobierno cu nos isla tabata tin. Un gobierno mal bruha. Nos isla ta pasando den un crisis cu un gobierno sin direccion. Nos pueblo lo mester bay tene duro pa locual cu ainda falta paso ta casi sigur cu schoolgeld lo bay aumenta si ta SKOA lo mester bay paga e werksternan.
Pa nos di partido Curpa locual ta pasando no ta nada nobo paso un gobierno socialista/comunista locual cu tin e intencion pa destrui su propio pais. Un gobierno cu ta forma parti di metanan di desaroyo sostenibel di United Nations cu tin e obligacion di implementa e agenda 2030. Un agenda cu riba papel ta mustra bunita, pero den realidad ta destruccion di un pais. E agenda 2030 ta bin di elite nan mundial cu ta scondi cu kier bin cu un gobierno mundial pa asina goberna nos tur.
Rond di mundo nan sa di infiltra nan alumnonan den gobiernonan y ta lobo bisti den trahe di carne cu awor kier saca na huñanan. Nan no tin amor pa pueblo. Gobiernonan manera Canada, Francia, Italia, Austria, Spañe, Hulanda y Australia ta alumnonan di e World Economic Forum. Busca e significado di e great reset. E lema di e forum ecomico mundial: lo bo no tin nada y lo bo ta feliz. Pronto nan ta bin cu bo no mag tin auto mas paso a nan kier goberna bo bida. Nos gobierno di Aruba tambe ta afilia cu e organisacion aki y p’esey nos mester habri nos wowo y mira e realidad.
