Otro scandal ta wak luz di dia y awor aki un scandal cu un embergadura sumamente dañino pa nomber y integridad no solamente di gobierno pero principalmente di pais Aruba. E scandal tin di haber cu e helicopter di polis. Locual cu a sali den prensa ta haci nos pais y nos husticia mustra malo ora ta laga traficando den libertad despues cu a garanan cu un cantidad substancial di droga. Esaki lo causa hopi daño si resulta di ta basa riba berdad. Aruba mester a traha duro den pasado pa a drecha nos inmagen internacionalmente y pa awe Aruba ta hinca den otro scandal. Esaki ta duna Aruba su gobierno un imagen di ta narcocomplaciente.

For di cuminsamento nos di partido Curpa a cuestiona e acuerdo cu a wordo cera cu e compania cu lo lease Aruba e helicopter. Nos ta corda cu tabata tin un destaho publico pero diripiente e destaho a dal un buelta straño y a bay cera un acuerdo cu e compania aki pa lease e helicopter pa polis. E forma con a cera e deal a bay contra tur regla di bon gobernacion y contra e leynan di comptabiliteitsverordening. A cera un acuerdo di mala fe y awe gobierno ta haya e bom ta explota den su cara. Unda e screening a keda? Cua institucion di gobierno a faya cu awe Aruba ta pasa un berguensa internacional?

Ora nos lesa e informacion nan cu a sali den prensa Colombiano nos mester pone man nan nos curason paso tur cos ta mustra cu nos gobierno a cera un acuerdo cu un persona cu ta vincula cu un cartel di Medellin. Vinculo cu un heredero di El Mexicano. E hefe di polis a laga debidamente pa medio di un korpsmededeling para uso di e helicopter mientras ta haci un investigacion profundo si e acusacionnan ta cuadra cu berdad. E acto aki parce di a cay den mal tera cerca e minister di husticia. E minister tin curashi di bisa di lo anula e korpsmededeling y lo laga e helicopter sigui bula manera nada a pasa. Esaki ta un ponencia hopi grave di nos minister di husticia pa en bes di para na banda di husticia e minister ta sali na defensa di algo cu sigur ta contra ley. En bes cu e minister bisa di lo bay haci un investigacion e ta bin dilanti y ta pone no solamente su cara pero henter cara di husticia, nos Cuerpo Policial y henter pais Aruba na berguensa. Hopi tristo un actitud di un mandatario asina. Falta di experencia ta pone tuma un posicion caminda su persona ta pone su propio cara na berguensa.

E gobierno aki tur ora ta tilde su opositornan di corupcion y awe nos por mira cu e scupi a cay den su propio cara. Imposibel kere cu den e tempo aki nos tin un gobierno cu ta tene man cu cartel di droga. E gobierno ta recoge e fruta di locual cu e mes a sembra. Tur cos ta mustra cu gobierno no por papia di dignidad pio di integridad. Unda nos parlamentarionan supuestamente Cristian a keda y ainda tin cuero di cara di sigui sostene maldad! Dios ta sacudiendo Aruba y nada lo keda scondi. Ora nos tin gobernantenan cu ta gusta gaña y bay contra leynan establece pa Dios nos no por spera nada bon. Esaki ta e caida di e gobierno aki. Partido Curpa ta e unico alternativa.