Tur dia nos por tende cu turismo ta progresa y tin hopi placa ta lora na Aruba. Hopi placa di berdad a drenta den caha di gobierno pero ta te eynan e ta yega tambe paso despues di drenta den caha di gobierno e ta disparce. E caha di gobierno a genera 24 biyon florin durante e ultimo 22 aña esta di 2001 te cu awe. Locual cu pueblo por tende ta cu 97 miyon florin ta bay na paga Public Private Partnership, 560 miyon cu a usa pa proyecto y pais Aruba tin un debe riba 6 biyon florin.
Dicon un debe astronomico mientras pais Aruba a genera basta entrada. Desde nos Status Aparte nos economia a florece, pero nos gobiernonan no a sa di administra e placa di pueblo. Den 2023 ta keda rek asuntonan manera cakiña sin cu tin un solucion. Mal maneho di nos gobierno awe tin cu pueblo mester paga mas na awa y electricidad, mas impuesto y tambe mester paga un eigenbijdrage na AZV pa remedi. Aruba ta caro. Tur producto y servicio a conoce un aumento, pero loke no a aumenta ta e entrada di e clase trahador y empleadonan di gobierno.
Na aña 2020 gobierno a haya 916 miyon fia di gobierno Hulandes y tambe a fia mas cu 300 miyon dollar riba mercado internacional pa un total di mas cu 1.4 biyon florin. Gobierno ta debidamente na altura di e caretera dilanti di hotelnan grandi y di e problema di e planta RWZI na Bubaliplas. Por a probecha di a drecha e caretera y e planta na Bubaliplas pero a hunga Sinterklaas cu placa di pueblo. Nos tin un gobierno cu tin 6 aña na poder cu tin como plan di gobernacion medida.
E minister di Asunto di Nos Grandinan a bin haya un rapport cla pero no a haci nada cune sino a dicidi di bin cu foro nacional djis pa gana tempo. Nos grandinan no por keda warda mientras dia ta pasa sin cu tin un solucion pa bienestar di nos grandinan. For april 2023 minister Arends ta draai rond y ta rek e asunto di nos grandi. E asunto di nos grandi tin urgencia su tras. Siña honra nos grandi pa nos isla ta bendiciona.
Ministernan ta felizmente biahando mientras tur caminda tin problema. E time bomb aki lo explota paso situacion no ta facil pa ningun hende. Costo di bida a subi drasticamente y nada ta wordo haci. Tur caminda bo ta tende cu pobresa ta aumentando y nos ministernan ta den avion. A yega tempo pa nos tuma nos pais back y no por lag’e den man di esnan cu a masacre. Aruba ta di nos. Dios ta odia inhusticia y nos pueblo ta wordo goberna pa un gobierno cu no conoce husticia. Aruba mester un gobierno di pueblo pa pueblo y no un gobierno cu ta sirbi interes personal y di famia. E vengansa di Dios ta na porta y esnan cu ta practica inhusticia lo sufri consecuencia di nan inhusticia. Cosecha locual cu bo a sembra. Partido Curpa ta e unico alternativa.
