Un aña cu mas medida riba lomba di nos pueblo di Aruba. E problema mas grandi cu nos ta confronta ta cu nos gobierno no sa con pa administra placa di pueblo. Mas placa drenta den caha di gobierno mas placa gobierno ta malgasta y mas debe nan ta crea. Pueblo tin cu cremencha pa gobierno sigui fiesta, lease autonan di luho y crea departamentonan nobo cu e solo meta pa emplea mas campañadornan.

E ultimo siman di December 2022 gobierno a core publica cu empleadonan publico lo ricibi nan 7.6% cu tabata pendiente. Esaki ta demostra cu gobierno despues di a masacra cartera di pueblo ta tira maishi pa empleadonan publico dunando nan e 7.6% cu nan a ranca for di nan na mei 2020 cu e mentira di ta pa fase y loonsubsidie. Esaki lo por ta un indicacion cu nan ta prepara pa bay cas den 2023.

Nos Parlamentarionan ta sigui tapa debenan di ex minister di turismo na un suma di 1.5. miyon di dollar y tambe ta tapa mal maneho di ex minister di Asuntonan Social den tempo di fase y ainda falta di crisis team, malgastamento di placa na Arubahuis y hopi mas. Unda integridad a keda?

Awg.40.000,= di e pagadornan di prima di AZV pa empleadonan di AZV bay fiesta. Segun informacion cu nos a ricibi ta 400 florin pa cabez y riba dje empleadonan di AZV a cobra un 13de maand (bonus) mientras empleadonan publico ta sacrifica nan 7,6% y nos grandinan y esnan sin trabao tin cu paga un eigen bijdrage pa remedi. Gerencia di AZV kier hustifica cu nan ta traha duro p’esey ta duna nan tin derecho pa haci uso fondo di AZV cu sali for di esnan cu ta obliga di paga prima di AZV. Cierto departamento y empresanan estatal tin e privilegio aki di fiesta cu placa di pagadornan di prima. Empleadonan di WEB nan fiesta a wordo para paso nan mester ta solidario cu pueblo pero esnan di AZV si no. Otro departamentonan di gobierno empleadonan ta saca placa for di nan saco pa bay comemento y pa tin celebracion di clausura di aña. Mientras empleadonan publico ta sacrifica pa boso goza, esaki no por wordo tolera mas. Riba dje e director kier hustifica su maneho desastroso. Den 2023 habri cu yen di medida pa pueblo. Nos ta decreta un aña di fin di inhusticia.

Otro tema cu a lanta cabez den final di aña ta sentencia den corte superior cu ta forsa gobierno pa legalisa e matrimonio di mesun sexo. Partido Curpa ta e unico partido cu a lanta para y ta kere den famia tradicional crea pa Dios cu consisti entre homber y muhe. Tur otro partidonan politico ta sostene e matrimonio di mesun sexo y pa nos di partido Curpa ta kere cu si e cambio di ley aki wordo trata den nos Parlamento, lo e wordo aproba sin ningun problema y cu resultado lo sali cu entre 15 pa 16 voto na fabor y solamente entre 4 pa 5 parlamentario lo vota contra. Pueblo no mester lubida cu no tin cambio pa locual a pasa dia 1 di maart 2021 caminda 17 parlamentario a sostene e ley di codigo civil aki y solamente 4 tabata contra. Nos mester sa cu esaki ta hinca den acuerdo firma di Agenda 2030 y cu pueblo lo no haya e oportunidad pa bay un referendum. Nos di partido Curpa cu den un referendum por lo menos 70% lo vota contra di e ley di matrimonio di mesun sexo.

Nos tin un gobierno comunista cu ta sinti cu nan palabra so ta conta y cu pueblo no tin derecho di vocifera nan opinion. Nan ta kere cu nan ta un baranca duro mientras tin un grupo di religioso ta gasta tur nan tempo den pusha e baranca. E baranca aki no ta move ningun caminda paso tin un speilo cu tine bon wanta. E speilo aki ta nada mas y nada menos e parlamentarionan Tevreden, Berlis y Guedez y cu solamente kita nan sosten e baranca grandi aki ta bin abao. Nos di partido Curpa no ta mira cu nan tin e curashi pa hala un banda y bin para banda di partido Curpa. Parlamentarionan Tevreden, Berlis y Guedez tin e yabi den nan man. Unda e principionan di e reino di Dios a keda? E palabra ta bisa cu si mi pueblo cu ta yama na Su nomber hala for di su mal caminda y pidi Dios pordon, Dios lo sana e tera. Nos pueblo di Aruba ta catibo di medida y ta wordo pusha pa biba den miseria. Nos di partido Curpa ta sinti nos yama pa sali na defensa di nos pueblo y nos criaturanan. Nos ta proclama 2023 como aña di libertad.