Sorpresa riba sorpresa cu e placa cu a wordo paga di mas na fase y loonsubsidie durante aña 2020. Tabata tin asina suma cu a wordo menciona pero a bin resulta cu e suma ta di 84 miyon florin y no 72 miyon florin a wordo bisa anteriormente.

Ni CAFT tin e suma exacto den uitvoeringsrapportage. Cuanto placa esaki lo suma pa e aña aki esta 2021? Bo por bisa mi cu bo por a faya den algun 1000 florin pero den 84 miyon florin? Un hende por faya pero no den un suma exorbitante asina. Ta haci como si fuera ta un par di florin tin riba caya anto cu lo no wordo cobra bek. E telraam aki si a faya pisa?

Despues di a regala Citgo 175 miyon di dollar nos ta haya un otro sorpresa di bida ta di 84 miyon florin cu a wordo paga di mas. No tin 20 miyon pa Serlimar y no tin pa empleadonan publico y no tin placa pa e otro n.v.’s nan di gobierno. A hinca WEB y AAA den un debe di 1.2 biyon florin. Locual cu si tin pa empleadonan publico y nv’s nan di gobierno ta un entrega e 12,6%. Riba dje ta economisa 11 miyon riba enseñansa y di otro banda ta regala placa na un school priva. Mi ta puntra mi mes ta te na unda nos kier yega cu tur e badabadanan aki pueblo!

Hotelnan a haya placa di mas y nan no mester paga bek. Pa colmo e conseho di SER ta papia di schenking na e hotelnan pero e empleadonan publico si mester entrega. MEP nunca ta haci nada malo pero semper ta hunga victima y Raiz no ta di conta mes. Unda integridad a keda den e gobierno aki? Esaki ta un berguensa total. E cos mas tristo di henter asunto aki ta cu nos parlamentarionan a vota unanimamente dia 30 di November 2021 na fabor pa sigui regala placa di pueblo y asina exonera e ministernan di tur nan culpa paso nan ta esnan responsabel. Nan no ta nos pero hunto nan por pa nan mes. Nos no ta nan pero nos complice awor si. Pa esnan cu placa tin regalo pero pa empleadonan publico y otro nv’s di gobierno no tin net net nada. Gobierno ta sigui refinancia nos debe nacional y asina ta sigui hinca pais Aruba den un abismo financiero. Unda nos ta awe ta nos mes tin culpa paso ta nos mes a pone nan eynan.

Nos tin problema social grandi aki na Aruba caminda kier cobra un eigenbijdrage pa remedi y kier economisa 60 miyon riba salud di nos pueblo pero tin pa regala hotelnan mas cu 84 miyon florin. Tin placa pa regala tur hende menos e yiunan di tera cu ta traha pa saca e lugar aki for di e desastre tras di desastre cu gobiernonan a hinca nos y e colmo de los colmo cu parlamentarionan no tin cuero di cara y ta vota unanime na fabor dia 30 di November 2021 pa regala placa di pueblo. Pueblo tin cu sacrifica pa nos ministronan y parlamentarionan biba dushi. Que viva el socialismo del siglo 21.

Pueblo di San Nicolaas por wel di lubida riba e apertura di nos refineria paso gobierno a firma dia 17 di December 2020 cu CommonTrust Network di World Economic Forum. P’esey nos por mira e bandera ta bula dilanti di Bestuurskantoor. Aruba ta forma parti di Sustainable Development Goals. Si WEB firma e acuerdo cu Eagle LNG e ta bay contra e acuerdo cu gobierno a firma aña pasa December cu ta cay bao di punto 7 di Sustainable Development Goals.

E situacion aki na Aruba ta birando cada dia mas dificil. E prijs di transporte pa Aruba a subi barbaramente y ta causante cu tur mercancia a conoce un aumento den prijs. No solamente prijs di cuminda a subi pero tambe nos ta drentando un tempo di escasez di alimento mundialmente y Aruba no ta prepara pa esaki. Nunca a traha dam warda awa. Nos no mester warda te cu ora cu e bati na nos porta. E escasez di cuminda ta na caminda. Laga nos cuminsa prepara pa e no cay nos di sorpresa.

Gasolin ta otro asunto mas unda cu gobierno ta pone un peso mas riba lomba di pueblo. Na aña 2008 tabata tin un aumento drastico den prijs di crudo cual tabata $147,= pa bari. E tempo ey nos ta corda cu prijs di gasolin a yega casi awg. 2,50 pa liter. Den e tempo aki e prijs di crudo no a pasa ni $100,= pa bari y e prijs di gasolin ta awg.2,46 pa liter. E medida aki ta trece basta entrada den caha di gobierno. Gobierno no por sigui pone mas peso riba lomba di nos pueblo.