Durante campaña ta priminti di traha bienestar di nos pueblo di Aruba pero despues di forma gobierno ta lubida tur promesa cu a priminti na pueblo. Ayera nos por a sigui e comedia cu a wordo hunga den parlamento.
A base di critica kier hustifica nan maneho y kier tira culpa riba e gobierno anterior. Si e gobierno anterior a haci malo ta bo deber awor cu bo ta den gobierno pa corigi locual cu a bay malo. No por ta asina cu si e gobierno anterior a haci malo cu esey ta duna bo e derecho pa hustifica bo mes pa haci malo tambe.
Biniendo riba e contract cu a wordo firma cu Eagle LNG prome cu di 5 di November 2021 te ainda no tin claridad kico a wordo firma y cu si berdaderamente lo ta na bienestar di nos pueblo den su totalidad. A discuti hopi den Parlamento pero el a keda solamente na palabra. A papia hopi y no bisa nada. Gobierno como doño di Utilities NV mester por tin control di kico ta pasa den e compania estatal. No tabata un secreto cu kier a retira e 2 directornan di WEB N.V. pa via nan no ta di acuerdo pa firma cu Eagle LNG. E prome stap a kita e director di Utilities N.V. y esey tabata bisto cu lo sigui pa e 2 directornan di WEB paso nan ta den caminda. Ora a caba di retira nan cu no tin strobacion mas ta pone nan hendenan cu si ta bay firma. No tin obstaculo mas. Asina ta pasa den paisnan socialista/comunista.
Pa medio di intermediario a hinca WEB N.V. den un debe di 700 miyon florin. Un prestamo cu por a wordo haci pa medio di WEB N.V. mes. kico tin tras di e procesonan aki? Cuanto porcentahe e intermediario ta gana pa e prestamo haci? E intermediario no tin ningun responsabilidad. Antes segun mi a compronde prestamo tabata ta wordo haci via AIB. E pregunta ta keda di con WEB N.V. mes no por a bin cu e sistema di gas si ta esey nan tabata kier y cu na bienestar di henter Aruba? Web N.V. por a laga core un tuberia for di waf di Barcadera pa WEB N.V. E tuberia aki no ta trece peliger pa ningun hende mientras esun cu mester sali for di San Nicolas pa Balashi tin un trayectorio largo.
E acuerdo cu Eagle LNG ta pa 20 aña na suma di 20 miyon di dollar pa aña cu otro palabra mas di 1.6 biyon di dollar. Den su totalidad WEB N.V. tin 700 miyon florin na debe y ta mara na 2800 miyon florin den 20 aña. Awor mas cu nunca pueblo di Aruba tin e derecho di sa kico ta e contenido di e contract aki.
E parlamentarionan tin e deber pa para duro pa e berdad sali na claridad. Bo no por defende un contract paso nan ta bisa cu e ta bon. Confiansa no tin mas unabes cu tur cos a bay scondi. Con parlamentarionan por duna nan opinion si nan no sa e contenido di e contract mas ainda pa por tin un votacion riba dje. E contract aki mester yega mas lihe cu ta posibel Parlamento. Interes di pueblo mester bin na promer lugar y esaki ta deber di nos parlamentarionan pa cumpli cune. Nos di partido CURPA lo sigui vigila e proceso aki.
