Presupuesto 2024 a wordo entrega na tempo mientras tanto e tin 2 luna drumi na Parlamento. Un presupuesto cu tin yen di spirito den dje. Un presupuesto sigur no realistico. E motibonan pakico e presupuesto no por a wordo trata den Parlamento ta obvio. Na prome lugar paso nos ministernan ta di biahe. Ta conoci cu na final di aña nos pueblo ta hopi ocupa cu diferente evenementonan festivo y no lo paga mucho tino kico gobierno y parlamento ta haci. Esaki ta e momento mas oportuno pa gobierno y parlamento, manera un ladron den anochi, pasa e medidanan cu ta warda pueblo na 2024. Ora pueblo realisa cu tin mas medida riba lomba di pueblo, ya ta laat.

Riba pagina 73 di e presupuesto 2024 ta papia di e trato igual (gelijke behandeling) y mas abao ta papia di e geregistreerd partnerschap cu ta bisa cu mester regla e e derechonan suplementario cu lo mester reduci e desigualdad. Esaki kiermen cu e geregistreerd partnerschap mester wordo adapta pa asina e matrimonio di mesun sexo bira realidad. For di 8 di September 2016 cu amienda 7 a bira realidad cu 11 voto na fabor y a sigui dia 1 di maart 2021 cu 17 parlamentario a vota na fabor nada no a cambia. A pesar di a papia cu prome minister nada a pone cambia di su pensamento paso el a laga traha e Aruba Nacional Gender Policy, el a hiba un discurso na Universidad di Aruba 23 di October 2022 y dia 3 di November 2023 na Den Haag nos prome minister a hiba discurso riba e tema di igualdad di genero. Gobierno a sigui su curso pa implementa e ley aki. Na Merca ora a cuminsa implementa e ley na scolnan, a bin hopi problema. E luna di orguyo a bira un luna caminda e pueblo Americano a rechasa e ley aki. Nos por corda cu Target, Walt Disney y Budlight a perde mas cu 40 biyon di dollar den menos di 10 dia paso e pueblo Americano a bisa ta basta. Awor aki na Aruba nos gobierno ta sigui pusha e ley aki y e ora ey nos por wel di lubida riba nos turista Americano. E turista Americano lo no bishita un isla cu su estilo di bida ta manera Sodoma y Gomorra. Nos unico pilar economico, esta nos turismo ta na peliger.

Nos por mira cu parlamentario Berlis kier bin duna un splicacion kico ta ideologia di genero y cu su partido mep ta para y kere ciegamente den e igualdad di genero. Berlis ta sigui sostene su partido mep cu a firma e Sustainable Development Goals cu ta consisti di 17 punto y e gender equality cu nr 5. Por mira claramente cu e manifestacion y e 18 mil firma no a pone gobierno cambia di pensamento. Riba dje e ta hinca den e presupuesto 2024. Por lo menos 16 parlamentario lo sostene e ley aki. Nos di partido Curpa ta kere Sr. Berlis ta debidamente na altura di e plan diabolico cu su partido mep ta forma parti di dje esta e Sustainable Development Goals pero e no tin e hombresa pa bisa su gobierno ta basta. Parlamentario Berlis a permiti e actonan diabolico aki yega nos scolnan caba y kier sconde tras di e manifestacion pero gobierno ta hari nan den nan cara. E gobierno aki no ta interesa den e bienestar di nos criaturanan y tampoco pa mantene e diseño original di matrimonio. Nos gobierno no kier hala for di e mal caminda cu nan ta aden. Hesus mes a bolter mesa den e tempel ora contra di ley di Dios a haci cas di su TATA Celestial cueba di ladron. Nos ta bibando den tempo biblico. Dios su vengansa ta na porta. Leynan di Dios pa partido Curpa no ta negociabel. Partido Curpa ta e unico alternativa.