Nos tin un gobierno cu ta mas bruha cu un bol di hilo. Un gobierno sin un maneho y sin vision. Un gobierno inmoral. Un gobierno cu a perde tur locual ta realidad di bida. No ta por nada e gobierno aki for di September 2016 a saca e amienda cu a wordo tira den bari sushi y a transforma e amienda aki den amienda 7 cu dia 8 di September 2016 ora cu e dos partidonan cu tabata mas grandi a brasa otro. E tempo ey si no tabata corupcion no tabata importante.

E linea di maneho y identidad di e gobierno aki ta inmoral y cada bes e ta wordo confirma den e maneho cu e gobierno aki ta hiba. E crucero di turista cu a drenta waf di Aruba dia 8 di februari 2023 y a converti nos centro di ciudad Oranjestad den un campo alegre. Paso locual cu a pasa tabata un berguensa total paso intimidad sexual bo ta haci’e den bo privacidad y no dilanti hende sin tene cuenta cu muchanan di menor di edad mester presencia actonan bochornoso asina. Tur esaki ta demostra cu nos gobierno a perde tur sorto di berguensa.

No mester mas prueba cu e gobierno aki lo bay cambia nan rumbo ni maske cuanto firma wordo recogi for di pueblo. Esaki ta e Sustainable Development Goals cu nos gobierno ta aden fuera di e ta inmoral pero tambe ta un agenda satanico. Nos minister president ta cabez di e actonan aki paso su persona a laga traha e Aruba Nacional Gender Policy y despues dia 23 di October 2022 a hiba un discurso na Universidad di Aruba riba e tema aki. Esaki ta e punto 5 den Sustainable Development Goals cu ta scondi y nos gobierno y tur parlamentarionan ta apoya.

Nos isla su unico pilar economico ta turismo y si gobierno ta kere cu su agenda inmoral lo yena nos hotelnan cu hendenan cu tin principio, norma y balor anto gobierno ta gran ekiboca. E turista Mericano lo no bin un isla inmoral paso si nan mesun pais nan a stop di bay un Disney World y stop di cumpra na Target, stop di cumpra Budlight paso nan ta apoya inmoralidad. E companianan aki riba un dia a perde mas cu 25 biyon di dollar. Locual cu nos gobierno ta haci ta kibra economia di nos isla y cumpli cu e lema di World Economic Forum, esta “you have nothing and you will be happy.”

Pa corona gobierno ta bin cu un hotel na Seroe Colorado cu yama Secrets. Un hotel solamente pa adulto. Ora di investiga mas leu nos por saca afo cu ta un hotel di hendenan inmoral. No ta paso bo tin placa esey kiermen cu bo tin norma y balor. Tur cos ta mustra cu Baby Beach lo no ta pa nos pueblo mas disfruta sino pa turistanan bin cana sunu.

Esaki ta e gobierno cu nos parlamentarionan supuestamente Cristian ta sostene y ta pega manera un cleconchi. E parlamentarionan supuestamente Cristian aki ta busca splinter den wowo di tur hende pero te dia di awe nan no kier saca e balki for di nan wowo. E parlamentarionan supuestamente Cristian cu conoce e palabra di Dios ta laga palabra di Dios cay pa ta apoya leynan cu ta contra leynan di Dios. Esey ta demostra ki clase di hende nan ta.

Dia cu inaugura e hotel aki e guestnan lo mester bin cu nan paña protocolario, esta a la estilo di Adam y Eva. Imagina bo nos ministernan y nos parlamentarionan den trahe di Adam y Eva. Ya cu nos tin un gobierno cu ta inmoral lo no sorprende nos. Si por a drumi 3 riba un kingsize bed pueblo no lo por spera nada otro.

Pueblo di Aruba laga nos tene duro y pidi Dios cuida di nos famia paso dianan duro ta nos dilanti. Laga nos peticion di oracion ta pa manda e gobierno aki cas. Dios ta pone gobierno y ta kita gobierno. Esaki ta tempo pa e fin di e gobierno inmoral aki. Partido Curpa un partido di famia ta e unico alternativa.