Lider di partido Curpa, Eric Ras: Gobierno ta gaba cu rapport di IMF y ta lubida e miseria cu nos pueblo ta confronta

E rapport di IMF ta cla y gobierno ta gaba cu e resultado di e rapport, pero IMF ta mustra bon cla cu e situacion financiero di pais Aruba ta hopi preocupante. Na aña 2021 nos por a tende cu producto interno bruto di ingreso di pais Aruba a crece cu 30% y na 2022 adicional cu 7%. Gobierno por gaba pero e realidad ta otro y amargo paso loke cu pueblo ta mira ta miseria. Nos pais ta den decadencia paso ya pueblo su placa no ta yega pa e necesidad basico. Si tin placa mester duna indexering na ambtenaar.

Nos por a lesa riba media social cu tin mas di 100 mil bezwaarschrift entrega na Departamento di impuesto. E 100 mil bezwaarschrift ta refleha un situacion alarmante y ta un indicacion cu tin cos cu a bay robes. Hopi hende ta papia cu nan mester haya placa back, pero dianan ta pasa sin cu nan ta ricibi locual cu nan tin derecho riba dje. Ta obvio cu gobierno bao firma di partido MEP lo usa diferente excuus pa e situacion, pero nos di Curpa ta convenci cu aki “hay gato escondido”. E ta refleha na prome luga un desesperacion di parti di gobierno pa ranca placa. Tin hasta papia cu gobierno ta lucha pa cera e placa pa paga e vakantieuitkering cu empleadonan publico tin derecho riba dje. Sin misericordia gobierno a corta den salario di empleadonan publico y no poco sino 12.6% y tarda pa duna nan placa back. Historia ta demostra cu partido mep ta un partido di medida y sin gevoel y ta forma parti di e mega debe.

Un otro motibo ta cu gobierno ta haci comosifuera e entradanan di impuesto ta halto pa di e forma aki por mustra CAft y gobierno Hulandes cu nan ta cumpliendo cabalmente cu palabracion haci pa tin un presupuesto mas apropia. Si en caso cu mayoria di e bezwaarschriften haya rason, anto esaki lo reduci substancialmente entrada di gobierno inmediatamente.

Sigui gaba cu Aruba su entrada a subi tin como proposito tambe pa hustifica sigui biaha, cumpra auto nobo y fiesta. Ta corta den overtime den ambtenaarnan. Placa ta drenta den caha di gobierno pero ta parce cu e caha ta sin bom y ta disparce. Gobierno no ta bahando su gastonan y a crea yen di fundacion pa asina esnan yega na partido por haya trabao. Otro aña 2024 ta e ultimo aña di e premienan di empleadonan publico y te ainda nos no ta tende e sindicatonan cuminsa move. Costo di bida a subi mas cu 30% den ultimo 2 aña y esnan mas vulnerabel tin cu biba di un sueldo minimo, un solo pensioen di biehes y no papia mes di esnan sin trabao.

Loke a hala atencion den ultimo dianan tacon sin berguensa nos parlamentarionan por bira paso nan ta prefera di keda 3 den un camber pa spaar di e $450 cu nan ta haya pa estadia pa a bay e reunion di IPKO y mas tristo ta cu nan no ta atende e reunion na manera cu mester ta. Gastamento di placa di pueblo paso te dia di awe e reunion nan aki no a produci nada na bienestar di nos pueblo. Na 2027 pais Aruba tin mas cu 1 biyon di debe cu ta caduca y cu pais Aruba mester paga back. Gobierno no ta spaar ni un cen y asina e gobierno aki ta sigui aumenta nos debe nacional. Si gobierno sigui asina nos debe nacional ta yega 7 biyon florin. Tur Aruba su empresanan estatal ta hipoteca y hasta a usa nos pensioenfonds pa fia placa segun informacion cu nos tin. No ta pornada den COHO tin sugerencia pa bende share di Setar, WEB y ELMAR etc.

Nos ta den e tormenta perfecto y e lunanan nos dilanti e economia mundial lo crash y banconan lo dal nan porta cera. Esnan cu tin placa na banco tin chens di perde locual cu nan a spaar. E banco mundial ta pusha pa bin cu e moneda digital pa asina tin mas control riba e pueblo. Aruba esaki ta tempo pa nos busca cara di Dios y pidi Su misericordia. E parlamentarionan supuestamente Cristian lo no sali na defensa di nos pueblo. Ta gaba BBO na frontera sin realisa cu lo ta e ultimo gota cu lo pone e hemchi pasa over. Partido Curpa ta e unico partido cu lo sigui lucha y ta sali na defensa di e famia y di nos yiunan. Un gobierno sin Dios ta un gobierno sin husticia. Esaki ta locual Aruba ta bibando.